Grown Ups

Adam Sandler 終於有番套似樣 D 既笑片，對上o個幾套實在係強差人意，今次仲搵埋一班搞笑巨星，實行不容有失。

今次呢套確實係幾好笑，有 D 位真係笑到肚痛，不過包含大量美式笑話。Adam Sandler D 戲不嬲都笑中有情，今次亦唔例外，帶出珍惜友情，親情既正面訊息，睇得過癮開心，值得推介!

Rating: 4/5

Splice

兩個無腦科學家將人同動物 DNA 結合，製造出新品種生物，結果最後搞到一鑊泡...

呢類異形片題材本來幾吸引， 不過我覺得開頭o個兩隻一團肉既物體好核突，同埋我唔係好接受到主角同隻異形搞囉，所以真係唔覺得好睇...

Rating: 3/5

How to Train Your Dragon

真係估唔到咁好睇! 故事好，畫面靚，音效勁，角色又夠晒生鬼有趣! 搵"魔法師的門徒" Jay Baruchel 為主角配音真係再適合不過，佢講野不嬲都有種好滑稽既感覺，做 D 傻野特別好笑...

主角同飛龍既感情描寫得好好，試飛o個段真係令人有種熱血沸騰既感覺! Dreamworks 既動畫一向比人感覺都好似比 Pixar 次一班咁，但今次呢套可以話係超班之作，好睇程度同 Toy Story 有得 fight。Pixar D 動畫有多 D 背後意義，但有時我覺得好似 How to Train Your Dragon 呢 D，純冒險旅程咁反而更 enjoyable!

Rating: 5/5!!

Resident Evil: Afterlife

都預左佢爛架喇，但點都逃唔過要陪人去戲院睇既命運...  結果完全係我意料中咁爛! 無劇情，齋 sell 3D 同慢鏡動作。Chirs 個角色我諗如果唔係想跟番隻 game 完全係可有可無，搵 Wentworth Miller 來做開頭仲要懶係 Prison Break 咁，實在太老套。臨尾同 Wesker 打個場更加係將 Resident Evil 5 Chris + Sheva vs Wesker o個段照抄，連分鏡都一樣，慳水慳力。成套戲我覺得最 OK 就係 D 3D 效果，係幾唔錯，不過我老婆同 Jonathan 竟然話乜都睇唔到，真係奇怪，唔通真係個個人對 3D 敏感度都唔同?

Rating: 2/5

Cop Out

無聊驚匪片一套，不寫也罷。個黑鬼煩到爆，懶搞笑但一 D 都唔好笑，都唔知點解 Bruce Willis 會接呢套垃圾，唔係等飛機無野做都唔會睇...

Rating: 1.5/5

Wall Street: Money Never Sleeps

無想像中咁好睇，但都唔錯。今集 D 現代金融 terms 有 D 深，有 D 細節都唔係聽得好明。Michael Douglas 既 Gordan Gekko 依然有大鱷風範，成套戲我其實就係想睇佢點東山再起，但套戲好似無乜高潮位，好似完得好平淡咁，都係第一集好睇 D。中段突然有 Charlie Sheen 客串番 Bud Fox 一角，呼應番第一集，叫做有 D 驚喜...


Rating: 3.5/5

MacGruber

美式動作笑片，預左係胡鬧，但都真係有幾啖笑下既。主角個角色擺到明係想扮 MacGyver，都幾得意，不過我成日覺得可能由 Owen Wilson 來做會適合 D...

Rating: 3/5

Letters to Juliet

成個月無 update，因為掛住玩 Dead Rising 2，疏懶左，睇下記唔記得番晒睇過 D 咩戲先...

首先係呢套，比我想像中好， 有別於一般愛情片，主線係老婆婆尋找初戀既故事，支線有年輕男女主角由鬥氣冤家變戀人，兩條線配合得幾好，加上意大利靚景，歌又好聽，令人睇得舒服。

不嬲都覺得女主角 Amanda Seyfried 個怪怪地，但係呢套戲某 D 角度睇又幾靚，順眼左...


Rating: 4/5

Centurion

套戲好似唔係好出名，可能因為唔算大製作，算係”中小”格局，故事以當年羅馬”第九軍團”入侵英國時，o係蘇格蘭山區神秘消失的真正原因為背景。個題材本來幾有趣，打鬥場面都唔算馬虎，都幾血腥，但劇情真係幾薄弱。主角們o係逃亡既過程中只係一直跑，完全無反擊的餘地，但最後竟然可輕而易舉咁消滅追蹤佢地既敵人，有 D 唔合情理，屬眼高手低之作。

Rating: 3/5

Wall Street

"Greed is good!"

Oliver Stone 呢套 87 年既作品我之前一直都未睇過，但一直被譽為當年經典，加上見最近將會上映續集，於是決定重溫一下。發覺真係幾好睇，雖然我唔係好熟 D 金融 terms，但故事都唔係太難明。同埋發覺原來好多經典金句都係由呢套戲出來，續集戲名 "Money Never Sleeps" 亦係其中一句。Michael Douglas 飾演既金融大鱷 Gordon Gekko 真係超級入型入格，我真係相信無其他人會做得更好，難怪呢個角色咁深入民心，令我對續集更加期待!

Rating: 4/5

Frozen

開頭覺得套戲個題材好似好 lame，點知睇落原來真係幾驚嚇，有幾幕仲真係要遮晒眼咁睇。套戲其中一句宣傳標語："Will do for skiing what "Jaws" did for swimming"，真係一D都無講錯，帶女去睇o岩晒!

Rating: 4/5

Robin Hood

套戲一出即刻買碟，因為對 Ridley Scott + Russell Crowe 有信心。套戲其實應該係 Robin Hood 前傳，整體故事，大場面，配樂都有 Gladiator 一貫水準，不過略嫌冗長，有 D 位比較悶 (可能因為我睇加長版)。

演員都幾好，我其實一直都有少少抗拒 Russell Crowe 呢個又老又肥版本既 Robin Hood，不過抱住 Gladiator 個 feel 去睇算係接受到，不過唔係太多位 show off 到 Robin Hood 應有既超凡箭術，反而講到佢好似舞刀弄劍乜都得咁。Cate Blanchett 呢套做得幾好，角色好o岩佢，真係有 D nobel 既氣質。整體來講套戲唔錯，值得一看!

Rating: 4/5

The Disappearance of Alice Creed

一套可能比 Exam 更低成本既戲，成套戲只得三個演員, 大部分時間都係一個場景。見宣傳話係唔知乜乜電影節參展作品，題材又好似幾吸引，於是 download 來睇下。

故事講 Gemma Arterton (Prince of Persia, Clash of the Titans 女主角) 飾演既富家女 Alice Creed 被兩名男子綁架，企圖勒索佢老豆一筆贖金，成套戲就係佢被綁架後困o係間屋既情節 (順帶一提女主角戲內有露點演出，見佢呢期咁紅有 D 估唔到)。海報講到話套戲 "twist after twist"，我其實覺得又唔係咁峰迴路轉，只係不斷的節外生枝，不過個結局幾好，睇完先知原來個戲名係咁解...

Rating: 3.5/5

Harry Brown

真係好鐘意 D 講 vigilante 既題材，there is nothing more satisfying than seeing someone taking the law into their own hands! 故事講剛喪妻既獨居老人 Harry Brown (Michael Caine)，居住於童黨肆虐既地區，一直對童黨所作所為看不過眼，直至連好友亦被殘殺，而警方卻束手無策，當過軍的 Harry 決定要親手制裁呢班社會敗類...

故事題材有少少似 Clint Eastwood o個套 Grand Torino，不過呢套比較大快人心。Harry Brown 並唔係o個種好 badass，一個打十個既角色，佢雖然當過軍，但因為老，佢追賊都會喘氣累低，開槍都會狼狽，但佢真係殺人唔手軟，而且佢 got nothing to lose，所以見著死有餘辜的童黨一個一個被佢手刃，心中不禁暗暗叫好!

呢個世界好多人都懶 moral 咁，但我其實真係覺得呢個世界有 D 人係真係該死，如果你清楚知道一個人既所作所為，每個人既心裡其實都可以即時判斷到佢係咪抵死，而好多人既結論都會係一致，其實係唔需要讀十幾年法律既法官去決定，只不過係文明社會信賴 justice and correction system。但當法律唔能夠保障我地既時候，people that can do something should do something。現實生活中我地無 Superman, Batman, Spiderman 制裁壞人，所以我唔介意有 Harry Brown 呢類既 vigilante，不過可惜依然要o係電影先會有呢種人出現...

Rating: 4/5

アマルフィ 女神の報酬

日本富士電視台慶祝 50 週年台慶拍攝既電影，卡士強勁，全片意大利羅馬取景，算係大製作。香港上既時候本來都買左飛諗住睇，不過臨時有事無去到...

前幾日 download 番來睇，唔係好明套戲點解叫 "女神之報酬"，成套戲好似同 "女神" 無乜關係 (定還是有 D 地方我 miss 左?)。香港上既時候更加打著 "日版達文西密碼" 既旗號，更加係離題九丈遠，"達文西密碼" 既地點係法國，你話係 "天使與魔鬼" 都起碼貼切 D，所以又再一次証明香港 D 電影公司有幾無知!

戲入面 D 境係好靚，真係令你想即刻飛去意大利咁滯，不過劇情認真麻麻。故事講 G8 高鋒會前夕，天海祐希個女o係參觀博物館時被綁架，而織田裕二飾演既外交官負責協助佢同綁匪周旋，同時要查出綁匪背後真正動機... 我發覺日本片好多時有個通病，就係企圖靠演員既演技，人物間既關係，某 D 位既短暫張力，來掩飾劇情既薄弱同不合理之處。但係呢種手法從來都唔 work (at least not to me)，呢套亦有相同毛病，犯駁位唔少，同埋尾段得悉匪徒真正目的之後，我同我老婆都不約而同覺得："咁咋下話，使唔使搞咁多野呀?" 織田裕二個角色應該類似日版 Jack Bauer，但成套戲都苦瓜乾咁既口面，無乜演技可言，佢戲入面講 D 英文仲要無句聽得明，我相信佢講既意大利文都係一樣。成套戲都用一首 Time to Say Goodbye 來貫穿，聽落好似好 grand 咁，但一首咁 common 既歌真係已經聽到有 D 厭...

Rating: 3/5

The Expendables

史太龍率領一班動作電影巨星，剛陽味甚重o既 The Expendables，由於史太龍對上o個兩套 Rocky 同 Rambo 都唔錯，所以一直都令我好期待。不過預左主角其實係得史太龍同 Jason Statham，李連杰都只係配角，阿諾舒華辛力加同 Bruce Willis 更加只係客串o左一個鏡頭。

套戲動作場面都算可觀，但故事同人物關簡直係支離破碎，完全 feel 唔到佢地幾個係一隊 team，同 A Team 個感覺差得遠。Jason Statham 條感情線更加係可有可無。劇情更加係牽強到暈，Bruce Willis 派俾佢地既任務開頭講到又話咩完成唔到就人頭落地咁，點知中段史太龍一句話唔做就叫交代左，但隨即又因為 D 無厘啦更既理由又要返去個島度，編劇真係求其得過份。本來想俾 2.5 分，不過見一班動作巨星真係難得聚首一堂，俾多半分!

Rating: 3/5

Pioneer SE-DRS3000C

由於老婆o來緊呢一年都要讀書，而當佢溫書時，我就唔可以開大喇叭打機 / 睇戲，而老婆又唔忍心下下要我戴(一般)耳筒，因為 5.1 環迴立體聲同 2 聲道對我來講實在差太遠，於是乎經過內部商議，上星期出旺角接o左我心儀已久既 "佢" 返屋企 - Pioneer SE-DRS3000C：

不過呢件玩具真係好貴，貴到我都唔好意思講個價錢出來，不過可以話我係用左"未來呢半年都唔買玩具"既 "承諾" 換番來既，所以可以想像到個嚴重性..

呢隻 5.1 耳筒可以話係全城熱捧，我其實都留意左好耐，隻野出左兩年個價仲不跌反升，因為同類產品唔多，另外可以同佢比就只有 Sony MDR-DS7100 同 Audio-Technica ATH-DWL5000，但所有評測都一致公認 Pioneer 係比 Sony 好聲，所以價錢都差一截，而 AT 個隻比 Pioneer 仲要貴 3 倍左右，所以就算聲再靚都唔係一般人買得起，所以 Pioneer 呢隻可以話係性價比最高，但最衰日本仔好野只係留俾自己，無香港行貨，所以只能夠買日本進口水貨，但有 D 人話淨係個外型都值回票價：

呢隻野可以模擬 5.1 效果，可以解到 Dolby Digital，DTS，AAC。仲有 3 個模式比你揀，DH1 - DH3 (由細至大空間):

而無線傳輸就用 2.4 GHz 無壓縮傳送，好處就係傳送距離可以遠 D 同埋有一定穿透力 (但我諗除非聽歌，否則無可能會戴住 Headphone 離開電視範圍)。壞處就係有機會會同其他用 2.4GHz 既電子產品干擾，如手機，Wi-Fi，etc。不過呢隻野有個3×3發送系統，即係部機會自動從3個頻道裡選擇干擾最少的頻率進行傳輸，pretty smart idea：

機背有兩組光纖，一組同軸，一組 analog 輸入，一組光纖輸出，我而家只係用光殲，一組駁左去電腦，另一組係 PS3 同 XBox 之間 switch (視乎要玩邊部)，但都唔係太麻煩。Front and Back:

用後感：
試左幾日，雖然唔可以比美真正既 5.1，但我覺得都有真正 5.1 大概 7-8 成效果，同埋戴住耳筒無其他雜音可以聽清楚更多細節，我自己暫時鐘意用 DH3 模式，因為比較接近私人影院效果，係"後置"好似唔係好夠後 (可能真正從後方來既聲音係比較難模擬)，而且 bass 唔夠強，但開左 bass assist 2 之後好左好多，而且遲 D 煲耐左我相信效果會更好。而打機效果比睇戲更加顯著，試o左幾隻槍 game，現場感一流，定位又準確。Headphone 質地同重量都幾好，戴得耐個頭都唔會話好唔舒服，差一次電可以用 7 個鐘左右，more than enough for 睇一套戲 / 打一舖機，何況耳筒都不宜戴咁長時間，而且電量去到低過一半先會叉，唔怕叉壞電。無線傳輸方面都好滿意，未試過斷線或爆音，只係試過一兩次窒左唔夠半秒左右，手動轉過一下 channel 之後暫時未再發生過。同埋以前用開一般 headphone 都留意到如果好靜無聲時會有一 D 沙沙聲既底噪，但呢隻無線耳機真係好似一D底噪都無 (就算有都係微乎其微)，好靜，所以係幾 impressive。如果你問我呢隻野值唔值咁貴，我覺得音質方面真係交足功課，外型更加係殺晒，而且作為一個住家男人，我念及日後可能好多情況下都無得開大喇叭，如果以後真係有咁多機會可以俾我 utilize 到佢，咁就可以算係物超所值!

Precious

Oscar 最佳改編劇本，但係一套睇完好令人心 "up" 的電影。戲入面主角既遭遇我相信一般過著正常生活既人就算睇 10 次都唔會 grasp 到十分一，而現實係真係有好多生活o係呢種處境下o既人。好難想像套戲係點拍出o來，去邊度搵 D 演得咁逼真既演員 (飾演衰老母o個位演員仲拎埋 Oscar 最佳女配角，Mariah Carey 亦有客串社工一角)，點做資料搜集，etc... 有時睇呢 D 戲真係可以令人"短暫"明白到，一般人遇到既所謂失敗，挫折，痛苦，相比起o來其實係何其微不足道... 不過選擇星期日睇套咁既電影實在有點兒沉重...

Rating: 3.5/5

Mother

真係 X 佢個 Mother!! 點解 D 韓國人拍戲可以咁 X 悶，又變態!  唔係話有咩血腥暴力鏡頭而變態，係我覺得韓國人真係普遍心理變態，例如有一幕個仔同阿媽訓覺無啦啦楂阿媽個波，但係完全同劇情無關架喎，真係睇到 R 晒頭。同埋個結局咁就叫好出人意表咩？唔係好覺囉，一早估到晒啦! 都唔知點解影評會一致 5 星推薦:

http://bluray.highdefdigest.com/3454/mother.html
http://www.blu-ray.com/movies/Mother-Blu-ray/11257/#Review

可能佢地呢 D 咁既催眠拍攝手法係鬼佬先識欣賞，總之一個字：悶，悶，悶!!!

Rating: 1/5

Diary of a Wimpy Kid

講條o靚仔第一年 middle school 既經歷，都幾搞笑，亦有 D 正面意義。戲入面條o靚仔遇到既問題，都幾能夠 relate to 以前細個讀書o個陣 D 戇九野...^^ 不過我相信如果o係外國讀書既會更加有共鳴...

Rating: 3.5/5

The Sorcerer’s Apprentice

比我預期中好睇，特技出色，男主角既角色滑稽討好，增加不少笑料，娛樂性高。但係唔知係咪 based on 小說定咩，有好多野交代得唔清唔楚，有 D 好似頗重要既角色但一出場就死，練功o個部分又唔夠詳細。但overall 我覺得 at least 好睇過對上幾套 Harry Potter 同埋o個套 Percy Jackson 唔知乜叉...

Rating: 4/5

Inception (Revisited)

*Spoilers Alert!*

入場睇過兩次之後，我確定片尾係無陀螺跌落來既聲音 (唔知網上邊條仆街o係度老作)!! 不過睇第二次真係可以俾我睇番好多之前睇漏左既細節，而呢 D 細節，令我更加肯定我既理解係無錯，就係 Cobb 最後真係已經成功完成任務，返番來現實...

我敢話經過呢兩次既 viewing，我對 dream levels，dream sharing，inception，extraction 既概念，明得無十成都有八九成。而最令人議論紛紛既主要都係最尾o個兩層夢既過程，我先嘗試下簡單咁重溫一下單 job：

飛機上，7個人入夢，dreamer 係 Yusuf

第一層，rainy city (因為Yusuf 飲左太多香檳所以夢入面落雨)，佢地捉o左 Fischer，中途受到 Fischer 潛意式攻擊，Saito 中槍，貨倉內 Eames 扮 Browning 話俾 Fischer 知佢老豆有兩份遺囑 (其實即係 suggest 俾佢潛意識聽："I will not follow in my father's footsteps")，之後眾人逼 Fischer 自己諗出 528-491 呢組數字。之後 car chase，Yusuf 留守，其他人落下一層...

第二層，hotel，dreamer 係 Arthur，Cobb 使出 "Mr. Charles"，話俾 Fischer 知佢發緊夢，有人向佢 perform extraction，誘使 Fischer 連同佢對付返自己既潛意識。Cobb 話匪徒想偷o既野可能係o係其中一間酒店房，Fischer 記得上一層綁匪逼佢說出 "528.."，於是一齊去 Room 528。其間 Fischer 自己對 Browning 既 projection 出現，因為 Eames o係第一層扮 Browning 時既舉動，令 Fischer 係第二層開始懷疑 Browning，所以 Browning 既 projection 承認因為唔想失去公司，所以唔可以俾  Fischer 接受佢老豆既挑釁：就係 Fischer 唔值得繼承佢既成就，要自己創一番事業 (其實即係等 Fischer 話返俾自己聽："I will create something for myself")。Cobb 話佢講大話，提議 Fischer 入 Browning 夢 (其實係入番自己) 睇下佢仲有咩隱瞞。於是 Arthur 留守，其他人落第三層...

第三層，snow fortress，dreamer 係 Eames。Eames 負責引開 Fischer 潛意識既追捕，Saito 負責帶 Fischer 潛入堡壘，Cobb 同 Ariadne 負責 cover。但因為 Yusuf o係第一層就來被追上 ，所以要提前衝架車落海，但第二層既 Arthur 同 第三層既其他人都 miss 左個 kick，所以唯有等車跌落海o個一刻先有第二個 kick。Fischer 入左堡壘，但被 Mal 鎗殺。本來任務失敗，但 Ariadne 提議再落一層，搵番 Fischer ("give him his own kick")，然後叫 Eames 到時再用起搏器救番醒 Fischer。於是 Cobb 同 Ariadne 落下一層，Eames 留守裝炸藥，Saito 負責掩護 (但最後不支死去)...

第四層，limbo (相信有D人會唔同意，但我相信第四層已經係 limbo，稍後再解釋)。Limbo suppose 係 unconstructed dream space，但因為 Cobb 同 Mal 來過，所以入面有 Cobb 遺留落來既建築。Cobb 同 Ariadne 搵到 Mal，Cobb confront Mal 並答應留低 (搵番 Saito)，Mal 講出 Fischer 係露台。Cobb 話 Mal 只係一個 shade，Mal 桶左 Cobb 一刀，Ariadne 開鎗射 Mal，Ariadne 推 Fischer 落樓幫佢製造 kick，同時 Eames o係第三層用起搏器 revive Fischer...

Fischer o係第三層醒番。Fischer 入去個 vault 度見佢老豆，佢老豆話 "I was disappointed that you tried to be me"，之後 Fischer o係夾萬搵到份第二遺囑同個風車，風車代表 "My father loves me" (代表佢地成功利用正面情緒向 Fischer 植入左 "My father doesn't want me to be him" 呢個概念)。

同時間o係 limbo，Ariadne 叫 Cobb "Don't lose yourself! Find Saito and bring him back!"，然後就跳落樓，利用 kick 上番第三層...

之後堡壘爆炸，為 Eames，Ariadne，Fischer 製造 kick 上番第二層...

同時間第二層，電梯爆炸，為 Arthur，Eames，Ariadne，Fischer 製造 kick 上番第一層...

o係第一 層，Fischer，Eames (扮番 Browning) 游番出水面，以為係佢地自己逃出生天，Fischer 話俾 Eames 聽 "my father wanted me to be my own man, that's what I'm gonna do"，然後 Ariadne，Arthur 先游出架 van 去第二度橋底 ... (之後我 assume Yusuf 靠之前個 kick 已經醒番o係飛機上面，負責收機令眾人訓醒 (除左 Cobb 同 Saito)

鏡頭轉返去 limbo，Cobb 同 Mal 講佢地曾經白頭到老過，但佢要 let her go，Mal 係 Cobb 懷中 "死去"，Cobb 亦慢慢閉上眼 (應該係因為 Mal 個一刀) ...

跟住落來結尾部分就係最多人有唔同意見，我自己就覺得係咁：

Cobb 神智不清咁出現o係變左老人o既 Saito 面前。我第一次睇以為 Saito 變老係因為佢死先，然後 Cobb 同 Ariadne 先落去救 Fischer，所以 Saito 過左幾十年佢地先落來，但第二次睇返原來唔係，係佢地落左去 Saito 先死，而且 Fischer 仲死先過 Saito，所以呢個諗法唔成立。但第二次亦都俾我睇到 D 線索解釋點解會係咁，o係第一層貨倉，受傷既 Saito 同 Cobb 有過類似既對話:

Saito: "Cobb, I will still honor the arrangement."
Cobb: "But when you wake up you won't even remember that we had an arrangement. Limbo will become your reality. You're gonna be lost down there so long that you're gonna become an old man. Filled with regret, waiting to die alone..."
Saito: "No, I'll come back. And we will be young again."

首先我覺得，死後落 limbo，同有意識下落 limbo 係有分別，如果死，就會 lost (我地見 Fischer 係露台個時都係迷迷糊糊，唔知係暈左定點)，但如果有意識下就會仲係正常 (好似當初 Mal and Cobb，後來既 Cobb and Ariadne)。而且我覺得就係以上呢段對話，令 Saito 死後， 潛意識投射左自己係一個 old man，filled with regret, waiting to die alone... 而另外我覺得 limbo 已經係盡頭，所以如果你死係 limbo，你返唔番現實的話依然都會留番o係 limbo，所以 Cobb 醒番o係 Saito 堡壘岸邊，可能係佢有經驗，意志力強，定係 Ariadne 臨尾同佢講個番說話有影響，佢神智不清但依然仲識得話要見 Saito。守衛o係 Cobb 身上搵到手槍同陀螺，Saito 認得係 belong to a man from a half-remembered dream，Saito 轉動陀螺，Cobb 記得佢係要來救 Saito，Saito 亦依稀記得 Cobb 同埋佢地既 arrangement，但因為 limbo 已經成為左 Saito 既現實，所以如果佢要信 Cobb 所講 your world is not real 就要 "take a leap of faith"，之後鏡頭影住 Saito 伸手拎槍...

我絕對相信之後 Saito 同 Cobb 都係用槍自殺 (或者其中一個射對方然後自殺)，然後成功醒番o係飛機上面。至於點解自殺就可以越過三層醒番，原因我覺得有兩個：1) 呢個時候 Yusuf 應該已經收晒機，所以已經無 timer 同已經無麻醉藥連著，就好似當初 Cobb 同 Mal 都係火車軌自殺就醒得番。2) 因為其他人已經醒晒，包括各層既 dreamers，所以三層夢境都已經唔存在。

臨尾個鏡頭影住個陀螺o係度轉，有少少搖搖欲墜咁就 cut 左，好多人話好明顯係發夢 (就係因為無影佢跌)，我就覺得咁 cut 法好明顯係導演想觀眾自己理解佢會唔會跌，並且係想帶出結局既意思，就係 Cobb 都已經唔 care 係唔係真實，同仔女一齊係佢成套戲既目標，而佢已經達到左... 相比番之前成日要轉陀螺，仲拎定支槍係手，準備一唔跌就自殺，而臨尾陀螺都未停就行開左去見仔女，心理轉變好大...

我再嘗試列多幾樣 Cobb 唔係發夢既理據：

1) 我留意到 Cobb 凡係o係夢境入面都有戴結婚介指，現實就無，而臨尾佢係無戴既
2) 如果佢係發夢，佢對上一次轉陀螺就係o係 Yusuf 地牢，當佢醒番之後入左廁所，轉緊陀螺時 Saito 入來，陀螺跌左落地下，如果要夾硬話呢下唔算，都通，但係唔通又要諗下咩人要咁做有咩動機，而且同之後個故事唔通... 而再諗多一層就要係理解為成套戲都係夢，如果係咁就真係要諗多好多，而且即係最尾個陀螺跌唔跌都已經無關係，加上 Nolan 拍既戲一般唔係話要諗爆你，只係比較有深度要你思考，所以我覺得應該只需要用最 straight forward 既方法理解套戲就可以...
3) 有好多人質疑 Cobb 老豆點識去機場接佢，其實都係 good point，不過我諗既然 Saito 可以打電話，Cobb 都可以，或者係 Ariadne 打都得，亦可能係 Cobb 開頭叫佢去接 Ariadne，又或者 Ariadne 怕 Cobb 醒唔返所以 call 定佢老豆都唔出奇，總知好多可能...
4) 之前 Cobb 都解釋過，發夢時你永遠唔會記得你係點來，但成套戲我地好清楚睇到 Cobb 係飛機 -> 機場 -> 屋企，連埋之前發生既所有事，所以我諗應該唔係發夢
5) 唔知呢樣算唔算，但我留意當陀螺o係夢入面不停轉時 (Saito's fortress, Mal's hidden safe)，係唔會有搖搖欲墜既情況，呢種情況係現實就來跌先會出現 (開頭酒店，workshop)

呢套戲我一定會買碟睇多十次八次，到時諗到有咩再寫...

The Karate Kid (Remake)

雖然係翻拍 84 年o個套"龍威小子"，但既然題材已經由空手道改成中國功夫，我唔明點解仲要叫 Karate Kid，完全貼唔到題。不過可能唔係咁叫 D 人就唔知係 remake，因為我見香港 yahoo 影評都有 D 低能仔睇完話套戲劇情係抄 N 年前套 "XX小子"... well no shit Sherlock! 真係唔知好嬲定好笑，有時網絡世界真係好多呢 D 無知扮代表...

Anyway，通常 remake 一般都係衰硬咁滯，舊o個套仲要係我兒時至愛，我仲記得當年睇完上晒腦，日日練金雞獨立，要求阿媽俾我學空手道 (後尾學左跆拳道，因為我唔知有分別同埋可能我只係想著住件袍踢下野 :P)  所以之前都有 D 擔心，但當我知到有成龍 + Jaden Smith + 中國 + 功夫，加上外國影評普遍讚好，我先有反返 D 信心...

睇完發覺的確係好好睇，雖然大部份情節都差唔多一樣，但中國 location + 功夫確實增添左好多新鮮感。Jaden Smith 果然係 Will Smith 個仔，除左個樣成個餅印一樣之外仲遺傳到 D 演戲細胞，演得唔錯，成龍雖然現實生活都算係一名仆街，但無可否認佢 D 戲確實幾好，我喜歡佢戲入面既過去多過 Mr. Miyagi，結尾比賽高潮部份亦一樣拍得震奮人心!  套戲亦都夠晒長，所以好多野都可以交代得清楚，我唯一覺得唔夠好既係：1) Jaden o係學校被人恰得唔夠金  2) 初期o既"外套"訓練唔夠體力勞動，同成效唔成正比，同經典既 "Wax on, wax off" 差得遠  3) 成龍送比 Jaden 既戰衣無一個"代表性" o既 logo...除此之外，套戲都算娛樂性豐富，又有正面訊息，我覺得真係好o岩一家大細去睇，我覺得某程度上仲 enjoyable 過舊版，值得推薦!

Rating: 4.5/5

SALT

呢套本來都算係唔錯既間諜片，節奏緊湊，由頭打到尾，動作場面算係幾精彩，只係略嫌某 D 地方有 D 犯駁同唔合情理。但 Angelina 太瘦，已經無晒惜日個種"索"，得返個豬唇都唔係好襟睇。加上睇完 Inception 之後，呢套真係完全被比下去了，我比唔到高分...

完場時我老婆問我："咁係咪即係佢成套戲都無著底褲?" =_='... 唯一令我老婆留意既係佢條底褲而唔係劇情，可想而知好睇有限...

Rating: 3.5/5

Inception

當我仲覺得 Toy Story 3 應該算係今年最好睇既電影既時候，呢個概念已經o係 Inception 頭 10 分鐘完全動搖!! Christopher Nolan 又再一次令我大開眼界，真係不得不佩服佢竟然可以諗出一個咁創新既意念! 成套戲我只可以用 mind blowing 來形容，講真，拍得出 The Prestige，Batman Begin，The Dark Knight 呢 D 神作，我 expect nothing less，只係估唔到佢依然可以超出我期望...

我覺得 Leonardo 今次呢套戲比起之前o個幾套真係型返好多 (雖然我老婆堅持留戀於佢 Titanic 既年代 ^^)，演技亦一如以往咁出色，你係完全可以 feel 到佢既情緒同心情，可以演到呢種效果既演員我覺得唔多...

另一位男配角 Joseph Gordon-Levitt 都幾值得留意，佢呢套戲既表現比我之前睇o個套 500 Days of Summer 好左好多，我老婆話佢似瘦版梁漢文 + 吳嘉龍，但我其實覺得佢都有幾分似 Heath Ledger。傳聞話佢會o係 Batman 3 飾演 The Riddler，我諗都有可能，呢套戲佢做得唔錯，俾 Christopher Nolan 御用都唔出奇...

套戲成兩個半鐘，但睇緊既時候真係一 D 都唔覺，因為實在太精彩! 咁o岩同戲入面發夢個 concept 有D 似，個 feel 真係意外地貼切!  我發覺睇親 Christopher Nolan 既戲，一睇完你真係會覺得精彩到即刻想睇第二次 (at least for me)，睇清楚 D 細節，今次亦都唔例外，我覺得導演最最最厲害都係佢最尾o個個 shot，我覺得比著其他導演可能會用左其他表達方法，但o個個 shot 真係 Perfect! 好 powerful，全場嘩然! 完場時所有人拍晒手掌 (我o係香港睇戲未見過)，可想而知套戲有幾好睇，所以我今次真係無辦法唔俾"爆"分!!

Rating: 6/5!!!!

鎗王之王

所以我話：再有吸引力既港產片，就算唔使錢，都要諗下先... 講真我真係俾面爾冬陞先睇下呢套戲，本來英皇出品 + 阿Sa, 已經係保證爛咁滯，我係見爾冬陞之前個兩套幾好 (新宿事件，竊聽風雲(監製)) 先破例 download 來捧下場...

故事開頭本來幾好，點知越後越爛，又要懶係玩犯罪心理學，點知又九唔搭八，眼高手低。兩位女角完全係可有可無，花瓶都不如。兩位男主角完全係演技大倒退，古天樂o係竊聽風雲明明做得唔錯，點知今次成套戲都係"卵呔能"咁既卵樣，吳彥祖亦無乜驚喜，好似大配角。本來有方中信既角色出現，連貫返第一套 Double Tap 幾有親切感，點知佢無啦啦問米咁上晒身，真係睇到我O晒咀... 上集張國榮套 Double Tap，係用 double tap 呢樣野，帶出案件同實戰射擊鎗王有關，今次 Triple Tap 只係用來話俾人聽開頭古天樂有幾勁，完全同劇情無關，有 D 唔夠貼題!

上集明明都係爾冬陞監製，今次自己拍埋點解會差咁遠?? 呢套戲唯一既好處就係令人懷念張國榮，令我有買番套鎗王 DVD 既衝動。

Rating: 2/5

The Ghost Writer

雖然導演波蘭斯基的獸行令人怨憤，但呢套 Ghost Writer 確實係幾出色。故事講 Ewan McGregor 飾演o既 journalist 受聘做 "ghost writer" 幫前英國首相 Adam Lang (Pierce Brosnan) 編寫一本未完成o既自傳，原因係因為上一位 ghost writer 突然離奇自殺身亡。其後發現當中可能牽涉連串政治陰謀...

同一般的懸疑片不同，套戲並無採用慣常一浪接一浪的 plot twists 同追殺場面，相反地用一個比較緩慢既節奏，將故事逐步推向事實的真相，慢慢營造出非常不俗的張力。結局我覺得亦唔算係咩驚天大陰謀，只係一個少少意想不到既真相，但睇完會有種令人暗嘆 "好片!" 既感覺!

再八卦做少少 research，發現現實中前首相貝理雅在伊拉克戰事當中，亦有一連串令英國人反感的"親美"政策，同劇情有少少不謀而合，導演好似想藉著套戲，來抒發對於兩國霸權行為的不滿，但真相係咪好似劇情咁，就要留返俾觀眾自己想像了...

Rating: 4.5/5

Toy Story 3

三集 Toy Story，橫跨 15 年，真係可以話係陪住好多人成長，仲要係一集比一集好睇，真係可以話從來無 Trilogy 做得到，even 我最鐘意既 Back to the Future 同 Star Wars 都做唔到咁既成果。今集少左一 D 角色，亦多左好多新角色，由第一秒到結尾都無冷場，有笑有淚，結尾更加係催淚彈，加上真正 IMAX 3D 效果，絕對係極級享受! 我覺得絕對好睇過 Avatar 十倍! 遺憾既係有咁好既享受，我隔離竟然坐左個睇戲時候鍾意大聲自言自語既仆街!! 佢又唔係智障控制唔到自己o個 D，佢係o個 D 真係當正自己o係屋企睇碟咁一路睇一路大聲 comment，時不時又 "呀，呢隻衰野丫"，"哈哈，人地喱埋佢地就走出去"，"佢頂帽呢?" 咁，真係勁 X 乞人憎!  遇著呢 D 人真係好無奈, 你好想 X9 佢但又怕佢引起罵戰而進一步影響其他人睇戲既雅興，呢 D 人真係遲早仆街死...

Anyway，套戲真係值滿分，如果有人會無興趣睇或者仲係覺得 Pixar 既卡通只係 for 細路既，they are too dumb to deserve anything good in life!

Rating: 5/5!!

Predators

雖然無左阿諾舒華辛力加，亦有 D 人可能會覺得無頭無尾，但呢套戲我覺得收貨。劇情有提過，呢集應該係發生o係第一集既 n 年後，所以同第二集同AVP系列完全無關。有 D 位其實同第一集都幾似，但我覺得係"忠實"而非"重覆"，特技同打鬥都幾有睇頭，我覺得幾 enjoyable，絕對好過晒之前o個兩套垃圾 AVP，Predator fans 應該唔會失望!

Rating: 4/5

Brooklyn's Finest

又一套香港人錯過o既片 (唔知點解套戲咁多明星都唔上)，Training Day 導演新作，劇情有少少似 Crash + Training Day + 少少無間道。劇情好寫實，成套戲最好就係 D 角色描寫，令你真係會好 care 戲入面角色既處境同下場。但拍出來整體好似少咁 D 野，好似有D 野想表達但係表達唔晒咁，相信如果齋睇劇本或者如果係一本書的話應該會正好多。

Rating : 3.5/5

From Paris With Love

John Travolta 飾演肥版 + 癲喪版 Jack Bauer，配文質彬彬拍擋 Johnathan Meyers。類似o既剛柔組合熟口熟面，劇情其實OK緊湊，不過氣氛過於輕鬆，好難令人 take it serious。Luc Besson 對上o個套 Taken 緊張刺激得令人喘不過氣，今次明有顯有點失手。

Rating: 3/5

The Road

另一套講"劫後餘生"既片，同 The Book of Eli 既橋段差唔多。但諗住無宗教成份會好睇 D，點知原來都幾悶。但就 make sense 好多，起碼真係覺得搵食物真係好艱難，feel 到個種 desprate，同埋真係會好怕遇到人吃人，兩父子既感情，主角對妻子既思念，都描寫得好細膩，不過整體來講套戲真係悶左 D...

Rating: 3/5

Exam

套戲應該成本極低，但拍出驚喜。故事講 8 位應徵者參與一份絕世筍工既終極考試，全片只得10個演員，一個場景，真係好考演員同導演功力，但都拍得出各人鬥智o個種緊湊氣氛同張力，盡顯人性陰暗一面。結局有少少俾我估到但都有驚喜，有種 "係喎，點解開頭估唔到呢?" 既感覺，首尾呼應，劇本實在寫得好，屬有創意之作，值得支持~

Rating: 4/5

Hot Tub Time Machine

好似自從 上年 Hangover 大 Hit 之後，荷理活就多左好多呢類一班人"歷險式"既 B 級喜劇。今次又玩時光倒流，所以真係橋唔怕舊，但如果拍得有特色 + 高娛樂性既，我其實又唔係太 mind。

套戲確實幾好笑，劇情都係o個 D 啦，唔 expect 故事會有太多驚喜，不過係主要係 D 對白搞鬼同埋飾演 Lou 既 Rob Corddry 既演出最搞笑，所以係值得一看。飾演三位主角少年o個幾位演員雖然出得幾o個鏡頭，但真係同幾位主角好似樣，唔講仲以為係電腦特技效果。

Rating: 4/5

She's Out of My League

見外國影評口碑幾好，所以睇下，發覺的確係唔錯，而且都幾搞笑。唔係一般o個 D 成班人圍威喂溝女 + 露肉 + 一堆咸濕笑話既青春愛情片。故仔係講機場保安員 Kirk o係機場邂逅"10分"索女 Molly,  後來 Molly 更主動提出約會兼順利發展成為情侶，但一向自問只值5分的 Kirk，不明所以的同時及在一眾好友燻陶下，自卑感慢慢湧現...

我覺得戲入面男主角同佢班朋友o既"計分制"都幾搞笑：男女相差唔可以多過 2 分，即係話如果你值 5 分，最多只配同 7 分既女一齊，夾 band 可以加 1 分... 真係咁都俾佢諗到 ，不過成班男仔 friend 一齊係會有好多呢D咁既無聊野...LOL~

套戲既題材都其實都幾似電車男，但勝在無左 D 婆媽o既喊苦喊忽情節。同埋我覺得現實生活如果有人好似男主角咁，無型無款但有 D 幽默感，都唔會話溝唔到女，最怕係o個 D 騎哩得來又無性格，淨係識做 Mr. Nice Guy 個 D，就真係注定最多俾人當 best friends...

Rating: 4/5

The A-Team

"I love it when a plan comes together!"

唔係講笑，呢套絕對係我今年暫時睇過最好睇既電影!! 滿懷期望去睇都喜出望外，真係無乜電影可以做到呢個效果! 選角一流，劇情緊湊 (唯一係個結局易估左 D)，動作場面精彩得來仲好有創意，仲要不乏搞笑場面，真係好耐無睇過一套娛樂性咁豐富既電影! 睇完行出戲院都聽到有 D 人仲哼住首主題音樂，可想而知係幾好睇! 四位主角性格鮮明，套戲能夠顯出各人特色之餘仲拍得出個種默契，令人 feel 到佢地真係一隊出生入死既 team。選角方面我覺得真係 perfect，好少 remake 電影可以令我覺得"新勝於舊"，我以前最喜愛既角色係喪榮，開頭都有 D 擔心 District 9 男主角 Sharlto Copley 會演得唔好，點知佢真係超搞笑 (扮 Braveheart 一幕真係笑到標眼水!)，絕對係成套戲我最喜愛既角色! 但唯一可惜既係鈍胎架經典招牌黑 van 開始無耐已經散左，之後就無再出現過...

Rating: 5/5!!!

講開 A-Team 真係有 D 心 up，事源我已經無奢望過我朋友中會有人咁有 taste 睇過舊版o個套劇集 (細個o個陣係亞視播架!)，但之前同屋企人飲茶，滿以為佢地呢個 age group，應該無可能無聽過"通天奇兵"o掛，於是同佢地提起將會上呢套新電影版，點知原來都無人知係咩o來，連一向最鐘意睇美劇既姑姐都話未聽過! 我話 "唔係下話，呢，有個大隻黑鬼叫鈍胎架呢，但好怕搭飛機既，仲有個叫喪榮，傻傻地但楂飛機好叻架呢..." 都係無反應，我當堂心灰意冷，唉，唔通搵個知音人都真係咁難...??

其實肯定大把人睇過，只係我識唔到...-_-

講開經典美劇，另外有兩套都係我兒時至愛，唔知遲 D 會唔會都被般上大銀幕呢?

MacGyver (中文好似叫：玉面飛龍) - 主角 Angus MacGyver 係一個通天曉，唔用槍，齋用腦，每次遇上任何困難，險境，都能夠運用智慧成功化解，男人典範!

Knight Rider (唔記得中文叫咩，好似霹咩靂咩...) - 講架識講野既跑車同男主角一齊警惡懲奸，當年男主角就係而家 "America's Got Talent" 其中一個評判 David Hasselhoff。o個時一架識講野既車係已經超 cool 既事，但而家連變型金剛都拍得出，我諗如果重拍呢套戲都已經無乜吸引力了...