Prince of Persia: The Sands of Time

星期日想睇戲，本來想o係呢套同 Robin Hood 之間二選一，但 Robin Hood 得番晏晝 3 點幾一場，於是就揀左呢套。雖然挾著 Disney + "魔盜王" 監製 Jerry Bruckheimer 之名，但自己本身對呢套戲無乜特別大興趣同期望，而且影評都只屬一般。但睇完後覺得都算唔錯，開頭係無乜特別，劇情一般，景又唔係特別靚又唔係特別壯觀，打鬥場面又唔係特別好睇，係睇佢跳來跳去好似打機咁，幾過癮。後半部開始好 D，高潮位同結局都唔錯，個人來講算收貨。唯一要彈既就係 D 配樂唔夠好，帶唔起 D 情緒同節奏。同埋男主角 Jake Gyllenhaal 比我既感覺好奇怪，佢又唔係唔靚仔，又唔係唔夠大隻，但係唔知點解就係唔覺得佢"型"，好似硬係差咁 D 野咁...

Rating: 4/5

不過我最鐘意既 Prince of Persia 始終都係呢隻:

香港之恥

日傳媒轟無線抄得太過分 《談情說案》疑抄日劇 廣管局接投訴

"...「我們是創作人，肯定不會抄襲﹗」《談》劇監製劉家豪強調並無抄襲，說創作時刻意把案件「本地化」，加插不少「屋企戲」，加上該劇以「談情」為主，與《神》劇完全不同，無懼被告侵犯版權，「你估查案劇是《神探伽俐略》發明嗎？我們的《刑事偵緝檔案》和《法政先鋒》也創作不少查案劇……事實證明一切，你看收視率便知，最緊要觀眾鍾意睇」。

劉家豪說，創作時曾參考《神》劇及美劇《CSI犯罪現場》，「如其中一集，有一輛食環署洗街車，這些日本劇一定無」，他說全世界的實驗室都差不多，至於角色同樣是警察和物理教授，他說這是刻意為兩個角色加入階層分別，「如果這樣也算抄，我們豈不是以後連醫生律師都不能拍？」..."

X佢老X! 呢條 PK 劉家豪咁無廉恥既說話都講得出o既?? 洗街車都可以做理據? 佢都幾灰膠鞋喎...

A Nightmare on Elm Street (Remake)

記得細個第一次睇"猛鬼街"係租帶年代睇錄影帶，睇完之後雖然覺得好恐怖，但覺得超好睇! 於是從此就愛上左呢個系列，Freddy Krueger 更加成為左我最最最喜愛o既電影角色之一。不過最近再拎返第一集隻 DVD 出來重溫既時候，可能因為已經睇過百九幾次，或者套戲真係太舊既關係，已經覺得套戲好流，完全搵唔返半點驚嚇既感覺... 自從知道荷理活會重拍"猛鬼街"，一路都有留意，雖然呢類 remake film 一向都不讓人存有任何期望，但始終係情意結，抱著"想睇佢拍成點"既心態，今日終於同老婆去左睇。

套戲算OK啦，一貫恐怖片方程式，片中不乏驚慄片常用的 cheap scares (利用 pan 鏡頭同突然大聲的音響靠嚇)。劇情有D改動，唔係搬字過紙，算係有 D 新鮮感，尤其係對 Freddy 既過去多左少少描寫。不過我唔係好鐘意電影開頭令人一度以為 Freddy 當初係無辜，本來佢咁改法反而幾好，令到故事有新鮮感之餘，更加令 Freddy 有更理所當然既服復動機，但後尾原來又唔係，感覺上反而有 D 唔合情理...

另一樣我唔鐘意就係 Freddy 個造型，以前o個個猙獰D，面部傷痕多D details，有代表性好多，新版 Jackie Earle Haley 所飾演既 Freddy 矮得滯，而且化妝太過似真燒傷，D皮拉到緊晒，完全睇唔到佢有任何眼神或表情，咁樣反而好似無咁恐怖，而且舊版 Freddy 邪惡得來有時會帶點黑色幽默，所以先會令人對佢又怕又愛，相比起來新版好似少咁D性格 (Left - Original, Right - New):

Anyway，我覺得新舊版本各有各好啦，不過新版相信無乜可能可以好似舊版咁，成為新一代經典了...

Rating: 3/5

The Wolfman

好一般，劇情一般，演員表現一般，特技一般，睇完都諗唔到有咩可以寫。女主角 Emily Blunt 係近年崛起的當紅女星，不過我暫時未覺得佢有乜特別...

Rating: 2.5/5

Autobots, roll out!

話說上次搞o左我兩個鐘先將文哥變到架貨櫃車，梗係要影返幾張相留念先啦：

跟住就輪到架 Bumblebee：

Chevrolet Camaro Concept，型到無朋友!

同 Truck Mode Optimus Prime 拍埋睇下..

Bumblebee Robot Mode (隨盒附送主角 Sam 人仔一個)：

原裝對腳車呔零件向內，怪怪咁，我o係網上學人地改裝左下身零件，而家車呔向返出面，不但唔會影響變型，而且比較接近返電影造型，成個醒神晒! 正!! (Left - Before, Right - After)：

o來多張大合照先! (由於背景板唔夠大，加上耐性有限，擺唔出咩型 pose... :P)

借阿 Sam o來用下，試下可唔可以 重組 Optimus 同 Sam 初遇o既一幕：

Haha..又幾過癮~~ ^^

近來多左嘗試幫D玩具影相，有時影得型型地，幾有滿足感~ ^^ 整多幾張先:

War Machine:

Athena Exclamation~~!!!!

Darth Vader:

The Green Mile / Apollo 13

最近在 Blu-Ray 上重溫了這兩部經典好戲，咁o岩都係由Tom Hanks主演。記得第一次睇 Green Mile o個時真係有種震蕩心靈既感覺，因為確係一個賺人熱淚既感人故事。事隔11年再睇返，震撼既感覺仍在，但多(少)了另一些感覺。之前睇覺得被獄卒 Percy 害得死狀可怖的 Del 十分慘，因為成套戲都塑造到佢係一個傻頭傻腦既好人，令人對佢既死法更加感到不值及對 Percy 的所作所為更加恨之入骨。但呢次睇既時候我不其然想起，Del 既為死囚，佢之前都應該係殺人放火，罪有應得，現在只不過是死得折騰一點罷了，憐憫之心頓時大減。可能係人大o左，理智o左? 定冷漠o左呢?

Apollo 13更加已經係 15 年前既戲，記得第一次係o係 Winnipeg 戲院睇，因為無字幕，自己D英文又渣，而且成套戲都係D technical terms，所以睇既時候原全唔知佢 up 緊乜! 所以無乜感覺，之後都無機會再睇返呢套戲，劇情更加已經忘記得一乾二淨，所以今次睇既時候可以當一套新片來睇，新鮮感都多左! 呢套真係一套精彩好戲，令我覺得當時睇唔明真係走寶。通常呢類片  (尤其牽涉太空人) D 英雄都係身負重任，乜都要自己做晒，當遇上危機，指揮中心 D 人往往只係識不知所措，藉以製造緊張氣氛。但呢套就o岩o岩相反，任務一開始無耐已經失敗，主角們只想平安回家，但困難重重，全靠地面指揮中心眾人各出奇謀，緊密協助，最後先可以渡過危機。所以最後主角們平安回到地球個一刻，群眾個種雀躍同激昂好能夠引起共鳴。

Rating:

The Green Mile: 4/5

Apollo 13: 4.5/5

Crazy Heart

初初對 Crazy Heart 有興趣其實係張海報，拍得好有滄桑感，好有大作 feel，第一眼望落仲以為係 Kurt Russell，睇真原來係 Jeff Bridges (Iron Man 1 個奸角)，不過香港遲遲未上映，後尾 Jeff Bridges 仲憑呢套戲拎埋奧斯卡最佳男主角。由於香港電影商一直都係採取"唔囉獎唔上畫"既後知後覺態度，所以到呢套戲係香港上畫既時候，DVDRip 已經在網上有得 download 多時...

由於屋企屯積左大量未睇既戲，加上最近同屋企人煲緊 24，所以呢幾日坐車終於有機會睇左呢套戲。故事講 57 歲既過氣 Country 歌手 Bad Blake，終日要靠穿州過省在下三流酒吧獻唱搵食，鬱鬱不得志，生活靡爛更有酗酒習慣，直至係墨西哥小鎮邂逅單親媽媽女記者 Jean，先令佢重新找到人生意義，但後來一次因飲酒走失了 Jean 兒子，令 Jean 決心離開。Bad 愧疚不已，於是決心戒酒，成功後更寫出好歌 The Weary Kind...

故事其實較為平舖直敘，不過我喜歡個結尾，令人有種遺憾既感覺...  Jeff Bridges 既演技確係值得一讚，個種潦倒同滄桑感真係好到位，更加估唔到既係原來佢本身都係一位唱功了得既歌手，片入面好聽的歌曲都係由佢自己主唱，所以我覺得佢絕對值得囉最佳男主角! 值得一提既係飾演 Bad Blake 徒弟既 Colin Farrell，長頭髮留鬚的他很有型，原來唱功亦唔差。開頭係 Bad Blake 口中以為佢係教識徒弟無師傅既反骨仔，但出場後原來係有情有義，講佢兩師徒個幾段戲亦係片中自己較為喜歡的部份。雖然套戲本身並唔算好好睇，但有演技同好歌搭救，令人睇得舒服...

Rating: 3.5/5

令人絕望的電視節目質素

TVB又再繼續強姦觀眾既品味，低質素節目一浪接一浪~  不文遊戲節目長做長有，遊戲萬變不離其宗，看女藝人被抽水仿佛已經成為觀眾既一種享受，何解無人覺得會教壞細路，而當o係報章上看到一些兒童風化案我地會覺得驚訝? 劇集更加係垃圾，同一個題材重覆又重覆，唔係就一味抄抄抄。近期既代表作有九流特技+劇情九屁不通既"飛女正傳"，遲下又有套明抄"神探伽里略"既"談情說案"，一套o係自己台播到街知巷聞既劇都可以擺到明照抄，簡直完全無將觀眾放在眼內，無廉恥到極點!!

奇在d節目爛極都不乏捧場客，綜藝節目越胡鬧越收得... 講開令我諗起蘇 Good，一個人格低劣，唔識煮野既人，d人都竟然會當佢(食)神咁拜，香港人 d 品味真係好奇怪! 可能佢地見識少，選擇少，所以無比較之下好似比 d 節目潛而默化左咁，無論d節目有幾爛，佢地都硬食，然後消化，所以 TVB 先可以製作咁多低質素節目而無人覺得有問題。講到尾我始終覺得佢地欠缺既係識演戲既新演員同一 d 真係有創作能力既編劇同監製，淨係靠幾個李添勝，黎耀祥呢d中堅真係唔撐得幾耐...

我玩佢定佢玩我?

之前買落左隻 Takara Tomy 電鍍版 Buster Optimus Prime，因為無地方 display 所以一直都未拆來玩。近日志高搬屋將會幫我接收晒D聖衣神話，個櫃會多返D位，所以琴晚得閒終於有機會"品嚐"一下呢隻被譽為出得最好o既"文哥"...

其實都預左變型過程會幾複雜，話晒都 Leader Class，但心諗market對象始終係兒童，應該唔會太難。點知最後搞左我成2個鐘先變到truck mode... =_= 我砌張 IKEA 床都唔使咁多時間，所以呢樣有乜可能係兒童玩具?? 其實主要問題係因為我怕整爛，所以好多時都唔敢太用力，但原來唔用力係唔得，同埋因為我唔識日文，所以淨係可以睇圖，好彩D圖都算表達得清楚...

不過最值得讚既係佢o既設計，由我活動佢第一個組件開始，我已經感受到佢個種精密程度，真係好佩服設計呢系列玩具既設計師。雖然我都覺得Robot Mode既身型比例，同電影入面仲係有少少出入，但要兼顧埋咁仔細既變型同靈活性，外型都做得有8成似實在已經交足功課。唔計細個玩個d，呢隻係我第一隻接觸既 Transformers 玩具，所以我都幾 appreciate 佢既仔細程度，平時d figure買返來擺好 pose 影完相都係擺係度，呢隻既"把玩性"確實高好多。下一步就係想試下一個鐘內變返佢做Robot Mode，跟住就輪到隻Bumblebee...^^

The Crazies

又一套生化病毒喪屍片，但係整體來講都算滿足到我對呢類片既要求：緊張，驚嚇，血腥，劇情交代得算情楚。同類片種來講呢套算係唔錯，值得一看，所以我俾4分!

Rating: 4/5

葉問 2

講明先，呢套我完全無諗住睇，但係都想寫下。自從上次"風雲再現"後，個感覺就好似俾彭氏兄弟輪姦左十日十夜咁，心靈既創傷久久未能平伏，所以我已立志一年內抵制港產片 (雖然上次已經破左戒同老婆屋企人睇"歲月神偷")。唔想睇葉問既原因如下：

如果葉問1都算最佳電影，甄子丹都可以提名最佳男主角，就證明香港人已經係無 standard 可言。我最記得葉問食到屋企淨返最後一粒米先肯去打工，呢種一代宗師既風範我自問真係唔識欣賞。連環拳好勁咩，得個樣好睇咋喎，打咁多野先有效即係無力啦...
加上有人話以下就係戲入面"最最最最最"精彩既幾場打鬥場面，如果係真的話，咁就真係更加唔使睇...

話就話一個打廿個，但每次出手得一兩個，其他蛋散就企晒係後面走來走去。大佬，呢招成龍年代都已經唔用啦... 反而隻揪個幾場都應該仲有d睇頭，不過想睇甄子丹 vs 洪金寶。我覺得睇返殺破狼好過。加上最老套都係又玩民族主意，上次打日本仔，今次打鬼佬，霍元甲都打到悶喇喎...不過點都總會令一群頭腦簡單自以為愛國 其實一有機會即拍拍屁股移民走人的民族主義份子入場集體自我安慰一番...

今次好明顯係上集收得乘勝吸金之作，雖然好似贏盡口碑但在我看來仍然係無 heart 之作。之後仲有套前傳，又有梁朝偉個套，香港人係咪真係要睇咁多葉問？顛覆歷史都要適可而止囉我覺得，葉問當年係逃避共產黨先拋妻落來香港，然後再娶，何來專重老婆，打咩10個丫...
如果你正在諗："未睇就唔好咁多野講啦!"
溫馨提示："關你x事!"

Iron Man 2

望穿秋水，終於等到佢上畫! 呢套戲令我期待既程度係僅次於當年The Dark Knight，套戲未上畫已經買定幾隻玩具，所以晨早買定飛上星期五一出即刻同老婆同屋企人去睇! 睇完既感覺係：失望。可能第一集實在太好，太多驚喜：故事好，特技好，估唔到Iron Man係咁型 (一直都覺得漫畫版個人設好核突)，亦估唔到RDJ做英雄可以咁討好，當年仲要只係拍拖經過，見無o野做，即興o係馬鞍山商場入面d cheap戲院睇，可想而知我當初既期望係有幾低，但驚喜係有幾大。今次既感覺o岩o岩有d相反，加上我睇個間戲院，唔知做乜播既時候，d字幕早出左成半秒有多，成日句對白都未講d字幕就出左，所以搞到我要好刻意咁避開d字幕來睇，真係好影響雅興。老婆話呢d野淨係我先會留意到，其實都可能係，好多人都 don't care enough to notice these kinna things，我覺得如果戲院突然間將環迴立體聲變成2聲道，都無乜人會notice...

***Spoilers alert!***

講返套戲，故事其實本身無乜問題，係今集導演個表達手法有點捉錯用神。好多人都話今集太多文戲，無乜動作。其實對比返，今集既動作已經比上集多。上集既故事俾我地睇到Tony點樣由一個玩世不恭既二世組變為一個認真，有責任既人，角色 develop 得好好。今集無啦啦又變返二世組，受左d挫折加上知道自己就來死就自暴自棄，我唔係好 buy 囉。上集佢夠比恐怖份子綁架，都係死梗架啦，但又會諗到造件鐵甲o來殺出重圍。我覺得呢d先係觀眾想要既野。同埋上集描述Tony設計/測試鐵甲既過程好詳細同好 interesting，但今集乜都好似話有就有，所以今集既文戲唔討好，觀眾都將期望寄托係動作場面上，但可惜戰鬥場面太短同大佬太易死...

今集換左個黑人做Rhodey, 不過佢個樣無乜表情，又似馬騮，同埋feel唔到佢同 Tony 個種友情，所以都係鐘意上集o個個多D。Scarlett Johansson 飾演既 Black Widow 都係花瓶角色，性格唔鮮明，除左臨尾個場打戲，真係好難令人care佢既存在...

成套戲我最最最唔鐘意就係d角色(Iron Man, War Machine, Whiplash)成日都著住件鐵甲既時候無緣無固要show個人樣出來，Iron Man又捽碟又跳舞又行來行去食donut咁。由於係戲服而非CGI，咁樣令到件鐵甲既金屬feel大減，而且感覺好臃腫，完全無晒個種英明神武既感覺! 我之前睇過Iron Man 1既製作特輯，導演都話過要俾觀眾感覺到鐵甲入面個人同個角色係同一人，所以係設計面具入面個控制台同大特寫都花過心思，而第一集Iron Man破壞左敵人既Targeting system所以敵人被迫打開駕駛倉，而Iron Man亦被敵人楂爛左頭盔，所以大家都要露面係無可厚非，睇落亦覺得理所當然。但今集成日無啦啦都打開，臨尾Whiplash捉住Iron Man同War Machine，都要打開個頭出來望下。實在有d太刻意同唔合情理...

講到尾好似彈多過讚，但其實套戲算OK，只不過係好既地方無彈既地方咁值得去提，值得一讚既係所有人物設計都好型，尤其係 Mark V 同 War Machine! 所以之後一定會帶旺d玩具熱賣。 順帶一提結尾上完字幕之後有段一分鐘唔夠既"預告"，係有關另一套正在開拍既Marvel英雄電影 Thor(電影中段亦曾出現過Captain America既暗示)，Avengers電影亦會於數年後推出。如果唔知係咩我就勸你唔好徙時間等，散場早d走好過，如果知道係咩的確會令人幾期待...

Rating: 3.5/5