Iron Man 3 - 我的世界末日的開始

其實已經放棄了寫電影觀後感 (唔用"影評"因為自知未夠班)，因為係付出左時間精神但無乜得著的事情。能夠激發我再執筆我諗一係除非套戲好正，或者一係非常爛。而可惜Iron Man 3係後者。呢套係繼 Looper 之後，另一套荷理活同大陸既合拍片，見證住大陸合拍片呢十幾年點樣一手拖垮香港電影業，以後荷理活都可能會步香港後塵，尤其睇完IM3後更加覺，以後可能真係連西片都無得睇，所以可以算是我世界末日的開始...

呢套係唯一既英雄片睇完令我有"界凳"的衝動，講真真係有乜可能可以拍得咁差，可以仲差過2？成套戲東一忽西一忽完全無重心。Tony患上PTSD感覺好似係潮流興英雄例牌要有心理缺陷而夾硬加入去咁。我諗連RDJ自己都覺得劇本牽強所以佢今集明顯都係hea做。嘩佢嗰幾下panic attack真係逼真到差啲想幫佢call白車。佢今集套主要戰甲Mark 42，唔係冇炮就無電，除咗臨尾自爆打大佬外完全係一無是處。我知你係prototype，我亦都"幫你諗埋"你係想特顯主角點樣靠自己，不過錯唒，拍唔出囉。隻Iron Patriot想點？有無發過一炮？無用到我都唔記得了。仲有個女配角想點？想忠定想奸？佢無啦啦掉轉槍頭嗰嘢真係唔知佢係良心發現定精神錯亂，事先俾多啲劇情內心戲得唔得？死不足惜。Unman Iron Man適量使用的話本來幾有新意，但過火了，你講到佢可以遙控Iron Man到呢個程度，之後你親身上陣我會覺得好無必要囉。另外笑位過多又唔好笑，Happy成日提住人地要戴badge好好笑咩，太多我覺得煩。Madarin原來係條廢柴好好笑咩？我無睇開漫畫所以我其實唔care你改成點，不過唔應該呢度係個笑位囉，你本身套戲前半部built up既suspense已經無乜，你中間仲要夾硬咁幽佢一默，即係將前半段既劇情沖晒落廁所o者，我之後完全唔可以take你個故事seriously囉。不過話分兩頭，你跟本無一個strong既third act，無一個真正"大"的危機/敵人去back up你之前既舖排，你唔將佢寫成廢柴都真係唔知可以點。敵人所謂既最終目的係咩？製造強化人士兵再自製外來威協，自製戰爭supply & demand。嘩sorry呢條橋到今時今日真係已經好老套，就算唔老套都絕對唔係一個咩驚天動地大危機囉!

"Hi I am Mandarin, actually I am an actor. But I don't watch any news, I didn't know the videos I made were actually used as real terrorist threats. Sorry~"

睇預告尾段高潮位有十幾隻Iron Man係威係勢咁，以為咩敵人咁巴閉，點知你話我知只係要來打嘍囉!!?? 我頂你咩! 天下間最大材小用莫過於此! 仲要兩野就俾人打散，又無個人特色，唔係睇過下D玩具介紹，完全唔會知邊隻打邊隻。隻疑似Hulk Buster - Igor只係衝出來托左兩下鐵就唔知去左邊。最後Tony打大佬，打一次要換四，五次甲，Iron Man最廢都算係今次。唔好同我講D生化人點勁點勁，漫畫又點點點點，拍出來feel唔到就係feel唔到，Avengers 數以萬計外星人又飛船又盛都係六條友打。你打一個大佬加嘍囉要咁多Iron Man並不是我可以接受範圍之內。臨尾個奸角講左句類似話"I have always been the Mandarin"，嘩大佬，乜係surprise位來咩？知左好耐喇喎，唔使正式講多次呀？最後整爆晒D甲又係為咩呢？我知你想Iron Man重新開始，不過算吧啦，你拍不出Batman燒大宅個種劇情。

"Yes, we are useless!"

成套戲只係得小鎮與小朋友聯手一段"無咁差"。套戲咁"垃圾"唔知關唔關得晒合拍片事，其實IM3 同 Looper 算係比較好彩，可能係頭炮，可以唔使跟足D合拍片規條。你見佢可以過橋抽板Cut 晒D中國片段就知。其實呢樣真係唯一令我心涼的事，跟據報導："王學圻扮演的吳醫生除了和國際版相同，在開場就有戲份之外，中途還打電話給東尼史塔克的電腦管家「賈維斯」，提醒鋼鐵人要注意身體..."。 嘩X, 真係聽到都覺夾硬兼老套，一套咁商業既商業片，真係想好睇都難!

"天啊，你殺左我吧啦!"

Marvel 電影片尾一向有伏筆，點知睇完更加火滾，完全只係一段無聊對話，無預告無伏線，浪費我時間，即係逼我爆粗o者! 因為香港最早上，而我第一日上畫就去睇，諗住之後劣評肯定會蜂擁而至，點知個個都話好睇。唉，所以我諗我敗了，我認係我問題囉，係我唔識戲，我唔知大眾口味只係想睇Iron Man fashion show，劇情係唔重要，Sorry係我expect太多，我被Batman寵壞了...

Rating: 1/5