Hot Toys Superman - In Memory of Christopher Reeve

講起 Superman，相信我呢D 70後 (到尾) 只係會諗起 Christopher Reeve，因為實在太太太經典。雖然當年第一集做既時候我都未出世，有機會欣賞呢位經典超級英雄都只係透過錄影帶，同其後既三，四集電影，但都足已令我留下深刻印象，記得個時一有時間就會番睇又番睇，同好多80年代既經典電影一樣，已經成為左我一份不能磨滅既情意結。

Christopher Reeve 除左做過超人之外，我只係睇過”Somewhere in Time - 時光倒流70年” (又係一套愛情經典，當年女主角靚到暈)。佢高大健碩既身型，漫畫人物般既英俊樣貌 + man 爆面型，佢同 Superman 既造型簡直係不可分割，係我心目中，佢就係超人。所以後來當我知道佢墮馬而導致全身癱瘓，餘生都要靠輪椅同呼吸器材渡過，實在有一份悲痛莫明。其實呢 D 事發生係任何人身上都係超慘，更何況係超人。後來04年佢因為心肌梗塞，與世長辭，享年52歲。戲入面刀槍不入，所向無敵既超人，現實中反被命運捉弄，只能嘆天妒英才。難得佢生前癱瘓期間，仲全力投身於公益事業，致力於推動幹細胞研究，呢份真英雄既精神更加值得我地尊敬!

要講隻 figure，難免要先講一堆擬似"藉口"既典故。話說我一向都無玩開12" figure，呢隻真係我人生第一隻 Hot Toys，一來因為實在太貴，幾千蚊一件玩具對我來講實在奢侈左少少，同我玩開最貴都唔過五六百既太大出入，加上無咁多位擺，所以一直以來都只係抱觀望態度，對呢類有錢人玩具無特別感覺。最近機緣巧合下比我見到有人以低於市價放售呢隻全新未開箱既 Superman，雖然我無玩開，但都有留意，呢隻真係算出得好，雖然我都有叫過人唔好買住，因為我都睇死 Hot Toys 將來實會出 DX 版撈多筆，但即使係，到時個價都唔會係我杯茶，而家呢隻全新賣 $1000 真係算抵玩，$1000 真係當初原價都唔止，可以話係跳樓價，加上好大原因係情意結關係，於是膽粗粗買o左，心諗就算買番來後悔，都仲可以賣番出去。咁事實當然係一買番來就忍唔住拆來玩啦~ 亦都為左要留個紀念，於是我嘗試以我有限既攝影技術 + 小學雞既器材，幫我心目中永遠既超人影番輯靚靚寫真!

一打開箱見到個盒，真係不得不佩服 Hot Toys 設計既心思，一個超大 Superman logo，用一個摺得埋既卡座托住，卡左對摺之後係個三角形，同個盒o岩o岩砌得成一個正方形可以擺入箱，連幾何原理都用埋，認真一絕! 我都見過 Hot Toys 其他包裝，呢個真係可以算係最有心思，個盒靚到可以用來做背景。其實以呢隻figure所跟既配件，個箱其實無需要造咁大，唔係 DX 版都做得咁有心思，確係抵讚，令我覺得以呢隻作為我第一隻 Hot Toys 係正確既!

一打開個盒見到呢幾隻字，唔係講笑，真係有少少 emotional，呢 D 係咪只係 Hot Toys 賺錢既 gimmick 我唔知，又話呢隻 figure 有部分收入會捐去 Christopher Reeve 既幹細胞基金又剩咁，但我自己真係大部分係為左紀念 Christopher Reeve 先買的 (RIP Chris~)：

開箱後圖 (仲有兩對唔同開合程度既手掌無show埋出來添~)：

Hot Toys 出名神似，不過呢個頭雕我夠膽講絕對係 Hot Toys 既 Top Five，金大師好野!!
我做左個對比，左面係 figure，右面係真人..Oh sorry，係調番轉先o岩。You see what I mean? 個頭雕簡直係完美，that IS Christopher Reeve!!

Body 都造得好好，包膠頸可以避免關節穿崩，身型比例亦都 fit 晒真人，好有真肌肉 feel，就咁睇已經好有美感。隻 Figure 跟一個 Fortress of Solitude 地台，造得幾靚，個支架擺落地 pose 一流，不過可惜地台無得發光，如果唔係仲 perfect：

Superman 點少得飛天 pose，"Oh 如果超人會飛..."~ 去相!

仿電影劇照 #1

仿電影劇照 #2

再來兩張仿電影劇照 pose：

呢張加埋特效真係幾似，I'm proud of my work!

我發覺其實得閒幫玩具影下相有幾個好處，其一就係你真係可以玩得盡隻 figure，每個配件，每個pose都擺過，仲有相做見證，比平時買番來只係擺好一個 pose 就 display 物盡其用得多。另外就係可以從拍攝/製作過程當中不斷 trial and error，不斷學習，增加自己對呢方面既認識，一舉兩得。

睇番 D 相，真係算係咁啦，我已經好滿意，我無玩相機，只係用部五年前 Cannon DC 仔，都算係用蔗渣既器材，拍出燒鵝既味道喇掛，算係對自己，對 Superman 都有個交代啦~ 另外如果我有以下咁既功力，我都好想將隻 Superman 改到咁樣，造型係參照 Superman III 入面 Superman 受到老翻 kryptonite 影響而變壞，呢個麻甩造型真係型十倍!!

可能因為呢隻算係入得平，所以我完全唔介意佢有一 D 小瑕疵，少少線頭呀，少少起毛粒呀咁，只要隻 figure 整體無問題就 OK，所以都唔知玩得幾過癮。我見網上有 D 玩開 12" 既人，真係小小野都要挑剔，個 S 字歪左少少都話要去換，諸如此類，不過買貴野係咁，梗係想所有野 perfect，玩起來都要就住就住，所以呢個都係我唔玩12"既原因。不過俗語有話一不離二，我唔排除日後有其他角色會吸引到我買，但都一定會係好好好鍾意先會考慮，或價錢先決，咁大個人會有分寸既。

Christopher Reeve 既超人真係絕世經典，佢既死絕對係電影界一大損失。早幾年套 Superman Return，Brandon Routh 接棒飾演既 Superman 雖然唔算十分差，但完全唔可以同 Chris 比，佢算係有 Christopher Reeve 個份俊朗，但我嫌佢有少少太青靚白淨 + 套衫太肉酸，個 logo 同條底褲都太細。之後將會有套重拍 Superman - Man of Steel，換左 Henry Cavill 來做 Superman。呢套我反而幾期待，因為導演係 Zack Snyder，同埋 Henry Cavill 真係算係有 Superman 個種獨特輪廓同氣質，不過套衫變左好有時代 feel，同埋唔知點解唔見左條經典紅底橫，唔知出來效果會點？Anyway，期待!

May he be flying again among the clouds and stars. He’ll be missed by all.