Real Steel

其實呢幾個月都睇過一 D 值得寫既戲，好睇既例如 Rise of the Planet of the Apes，3 Idiots, etc。難睇既代表有 Tree of Life, etc。不過呢輪都無乜閒情寫 movie blog，遲 D BB 出左世可能更加無時間，所以呢篇可能係今年最後一篇...

Real Steel 呢套戲其實真係可以話係o個 D "睇 Trailer 已經知道成套戲講乜"既戲：潦倒過氣拳手突然被迫認返親生仔，跟住從參與鐵甲拳賽過程當中重新建立父子情... 類似既橋段直頭係將 N 年前史太龍套 Over the Top 搬字過紙。老套情節更加係充斥住成套戲，你完全係會估到晒 D 劇情，估到晒佢邊場比賽會輸，邊場比賽會贏，連最尾高潮大戰都係用拳擊電影 (如 Rocky) 最最最常用既橋段 (Spoilers Alert! 唔想睇請跳去下一段)：開頭捱打，消耗對手體力，然後絕地反擊... 所以唔知導演係咪想向史太龍致敬呢?

以上好似講到套戲好睇極有限咁，但實際上套戲值得我寫既原因係即使有以上既因素，都竟然仲可以令我覺得好好睇! 原因絕大部分歸功於演員出色既表現。Hugh Jackman 既演技毋庸置疑，但飾演佢個仔既小演員 Dakota Goyo 亦非常有驚喜，老積得來不失可愛 (雖然中間有一兩個位我覺得有少少 over 左)，角色夠討好，令人更加容易投入佢同父親同 Atom 既感情。仲記得個細路一出場時，我身旁有位女士 (唔係我老婆) 不禁暗叫："嘩好靚仔呀!"。所以可能女性睇會更加易被佢"迷到"...haha~

激昂既情節亦拍得夠晒熱血感人，亦係令我覺得套戲好睇既原因，加埋 D 配樂，真係令人有想跟主角一齊吶喊，歡呼既衝動。我發覺我實在係對呢類熱血既情節無乜招架之力，所以每逢有親呢 D 情節我都一定受晒。Disney + Dreamworks 既電腦特技效果更加係信心保證，像真度絕對同 Transformers 有得輝，一舉手一投足好似真人咁流暢。打鬥時 D 金屬撞擊聲亦夠晒震撼，低頻野野打心口，o係 IMAX 睇應該會好正。將來出碟必買!

另外我幾鐘意套戲無將任何感情同人性放入戲入面既鐵甲人度，令人可以更加著重一對父子情，亦比到觀眾一 D 思考既空間去估到底 Atom 其實係咪聽得明主角講野。導演之前只係拍過 D 類似 "Night at the Museum"，"Date Night" 呢類中等貨色，估唔到呢套可以拍得咁有 heart。總括來講呢套絕對係一套適合一家大細睇既好片，值得推介!

Rating: 4.5/5

Captain America: The First Avenger

套戲話到明叫 The First Avenger，即係擺到明只係為 "The Avengers" 鋪路，所以成套戲既感覺就好似之前 Thor 一樣，只係一個大序章。劇情唔算非常精彩，無乜高潮位，但我覺得至少好過 Thor，二次大戰背景 + Captain America 既身世由來都算係幾 interesting。中段略嫌太快，幾個鏡頭就交代左幾場戰役。Hugo Weaving 飾演既奸角 Red Skull 角色同造型其實好正，不過好似無乜"作為"就玩完。我反而覺得結尾一幕 Cap 醒返 + 片尾字幕之後既 The Avengers 預告先至係高潮所在，起碼有令人進一步期待 The Avengers 既感覺。

我其實真係唔算係漫畫迷，只係對 D 大路角色叫做略知一二咁，呢套戲同其他 Marvel 電影一樣，入面都有好多"隱藏要素" (Easter Eggs)，同其他電影/漫畫故事息息相關，所以都幾得意，我留意到既有以下幾樣，例如:

1.) 片中有 Howard Stark (Iron Man - Tony Stark 個老豆)，係個幾重要角色，負責幫 Cap 設計裝備等，令人聯想到 Stark Industries 既由來。佢開頭一出場就o係個類似 Stark Expo 既展會介紹"飄浮汽車"，所以遲 D Avengers 個 D 飛船都應該係 Stark 出品...

2.) Red Skull 口中所講既"神"，應該就係 Thor 一族既 Asgardians，而個 cube 直情就係 Thor 片尾預告o個個，Red Skull 亦有提過係屬於 Odin (Thor 老豆)，臨尾落入 Howard Stark 手中

 3.) Steve Rogers 被"強化"左之後，有個護士幫佢抽左好多支血，話因為 Dr. Erskine 死左，所以唯有 study 佢既血先可以嘗試再做番 D Super Soldier 血清出來。而 N 年後就係因為 Bruce Banner 研究唔成功，所以先會變成 The Hulk

4.) 戲入面 Cap 個 friend - Bucky，漫畫中佢後尾會成為 Winter Soldier，最後仲會取代 Steve Rogers 做 Captain America，雖然之後 D 電影未必會拍得咁長遠，不過戲入面都有佢做 sniper 既一幕，亦有一幕曾經執起 Cap 個盾牌。鍾意呢個角色既睇到呢幕應該會會心微笑...

5.) Red Skull 個下屬 Arnim Zola，戲入面係個普通科學家，但漫畫入面係一個著鐵甲既奸角，個頭係o係心口個 screen 度。佢出場o個一幕係 zoom 近影住佢個樣既倒影，令人聯想到佢漫畫既造型，之後有一幕佢立野走，有一刻影到有張設計圖係件大鐵甲...

6.) 臨尾 Red Skull 楂住個 cube 有度光射上天，顯示一個類似銀河系既地方，跟住比度光吸走，個銀河系o係 Thor 出現過，所以 Red Skull 應該未死，而係去左 Asgard 或者另一"界"

另外值得一提既係開頭"孱仔"時期既 Steve Rogers 既特技做得超似，唔知係咪用 "The Curious Case of Benjamin Button" 同一種技術，搵個瘦人來拍，之後再 key 主角個樣上去。但係出來效果真係好 impressive，真係唔覺有破綻咁滯!

套戲話就話有 2D & 3D 揀，但其實基本上你係唔會搵到一間大戲院係有 2D 版既，所以即係又焗睇 3D，呢套唔係用 3D 拍， 所以 3D 效果只屬一般，只係有兩個飛盾既鏡頭比較突出，如果唔係無得揀，真係睇 2D 好過...

Rating: 3.5/5

The Lord of the Rings: The Motion Picture Trilogy - Extended Editions

上個月入左呢套 LOTR Extended Edition Blu-ray，15 碟套裝，加長版佔六隻碟，三集共 726 分鐘，平均每集四個鐘，真係估唔到今時今日 50G blu-ray 年代都仲要一集分兩隻碟。我地用左四個禮拜，分開六次睇，終於同老婆重溫完呢套曠古爍今既史詩式驚世巨著。正就梗架啦，不過除此之外，其實今次無咩寫，因為都真係諗唔到點樣形容佢點正法。套戲都差唔多10年，但係睇完之後都不期然覺得，就算近年最大製作既 Avatar，相比起來都真係不外如是! 戲入面所有野，由人物，故事，場景，到特技，化妝等，都比到你一種好"浩大"既感覺，戰爭場面o個種千軍萬馬既磅薄氣勢真係到今時今日都未有人拍得番出來，我相信亦都好難會有，因為我諗就算有都應該唔會再有一個好似 LOTR 咁"浩大"既史詩式故事比你拍，所以如果話 LOTR 係 Greatest Movie Trilogy of all times，都應該真係實至名歸! 成個系列我唯一一樣野要挑剔就係o個幾個 Hobbits 實在太 gay，真係每次有佢地既情節都 feel 到佢地個勢好似會隨時打茄輪咁濟。其實點解佢地既友情唔可以好似其他幾個男人咁"肝膽相照"一 D 呢? 不過我相信呢 D 應該唔係導演既錯，可能原著佢地都係咁"重感情"掛...

"唔...啜啜啜..."

我發覺我好似越來越睇唔起 Avatar 添...

Rating: 5/5 (of course)!

Kung Fu Panda 2

其實當年 Kung Fu Panda 雖然唔差，但在我來講只算得上"喜歡"，並未至於話"好正"，買 Blu-Ray 都只係因為平同埋多"試機位"... 但今集 Kung Fu Panda 2 我覺得真係好正!! 故事同動畫都比上集更出色，好耐都未試過o係戲院笑到標眼水!

不過次次想話去戲院睇呢類動畫都幾頭痕，因為我地鐘意睇英文版，但英文版往往好少戲院做同埋好少場，基本上你第一個禮拜唔睇再過多一個禮拜就得番一兩場，仲要細戲院。其實我真係唔知邊個規定動畫/卡通片一定要配音，先莫講話失去原味，lost in translation 等主要問題，我亦明白有好多細路要睇，不過 Harry Potter 唔駛配音 D 細路都係咁睇架啦，所以根本都唔成理由。同埋就算係都唔使得咁少英文版下話? 橫掂D香港人都慣左成日扮晒野要 D 仔女學好英文架啦。所以點解唔可以多 D 戲院播英文版? 同埋論卡士，有 Jack Black, Angelina Jolie, Gary Oldman, 楊紫瓊，尚格雲頓唔揀，要我揀陳奕迅，何韻詩，房祖明?? 咪玩啦...

吐完苦水，講番套戲。今集既動畫明顯比上集更出色，加埋 3D 效果更加正，好多景深效果真係做到出來。同埋多左好多功夫場面，Po + Furious Five 各人既招式配合得天衣無縫，打得精彩過癮，奸角 Shen 既孔雀開屏飛刀亦都好華麗，證明畫師同動作設計都下過一番苦功。故事幾好，講發明煙花既孔雀一族繼承人 Lord Shen 當年走上歪路而被逐出"宮門城"，長大後發明左大炮，想用佢來銷滅"功夫"同埋統治中國，Po 同 Furious Five 奉師傅之命到"宮門城"阻止 Shen 同埋消滅呢樣強大殺人武器... 而故事當中亦涉及 Po 既身世之迷。尾段 Po 同佢"鵝爸爸"既父子情都有少少感人，故事亦道出 "放下過去，擁抱現在與未來" 既人生哲理。Gary Oldman 聲演 既孔雀 Shen 真係好入型入格，絕對令今集生色不少。Jack Black 聲演既主角熊貓 Po 亦一如以往咁搞笑，不過今集再多 D 笑位，有幾幕真係笑到肚痛。Angelina Jolie 把聲真係唔知點解好襯老虎 Tigress 呢個角色，今集仲同 Po 多左 D 感情戲 (唔算得上愛情，但 feel 到有份心照不宣既情義o係度)。楊紫瓊o既個種帶少少中國口音既聲線亦都好有智者既味道，好襯佢 Soothsayer 既角色，最驚喜係有尚格雲頓聲演 Master Croc 一角，雖然戲份唔多，但真係好耐無聽過佢吧聲...

如果話 Kung Fu Panda 唔駛睇 1 都可以先睇 2，我唔係好同意，雖然劇情無關連，但係如果未睇過 1，你唔會知 Po 係點樣成為 Dragon warrior，佢同師傅，同 Furious Five 既友情係點建立既。我覺得如果無左呢 D 背景會比較難投入 2 既劇情。所以雖然 2 都算係屬於今個暑假必睇既佳作，不過如果未睇過既，睇左 1 先會好 D...

Rating: 4.5/5

Harry Potter and the Deathly Hallows: Part 2

橫跨14年，經歷過七本小說，八套電影，Harry Potter 終於來到終結，淨係呢一點都已經值得入場支持。其實我無睇過小說，亦唔係特別鍾情呢個系列，不過電影來講，我都叫做睇過晒咁多集，而我最鐘意始終都係第一，二集，因為當時所有野都好新奇，巫師，魔法學校，etc。主角同現實既小朋友一樣，番學之前要置各式各樣既物件，但佢地 D 物件有趣得多，自然令人覺得新奇之餘又有親切感。故事又好，係一個娛樂性極高既魔幻歷程，導演功不可沒。雖然到第三集換左導演，但都 OK。然後第四集又再換導演，都好左，我都幾鐘意 Goblet of Fire。之後 The Order of the Phoenix 就換左而家呢個導演，拍到而家。

但我其實唔係好鐘意呢個導演 (David Yates)，先唔講話佢拍 HP 之前完全無拍電影經驗，特技場面雖然拍得好有睇頭，但佢交代劇情既能力真係比較弱, 佢拍呢幾套 HP，我唔知佢係 expect 個個都一定睇過小說定咩，好多劇情都"眨下眼"就交代左，或者完全無交代，呢 D disconnections 搞到我當初睇完好快就唔記得晒 D 劇情，如果唔係無耐之前先番睇過前幾集，直接睇 Deathly Hallows 真係未必睇得明。另外就係佢拍得太"黑暗"，套套 D 畫面都黑 mung mung 咁，連一 D 日光日白開心既情節都拍到灰濛濛咁。即係唔係話黑唔好 (如果你係拍緊 Dark Knight 既話)，不過佢比我感覺係佢太想o係套戲入面加入自己既 signature, 但有少少 over 左囉我覺得...

廢話講完，講番 Part 2，其實今集我覺得算係呢個導演執導以來最好既一集，起碼唔悶先，一開頭就來一場 Bank Heist 刺激下觀眾情緒先，白龍o個幕拍得幾好，條龍好真。之後基本上就已經移師 Hogwarts，即係開場無幾耐大戰已經一觸即發。Part 2 交待既劇情比較少，主要係講佢地點樣搵+消滅埋其餘三個 Horcruxes，其餘就係正邪大戰， 交代 Snapes 既背叛，同 Harry，Voldemort 既終極一戰。魔法大戰雖然不外乎係 fing 下支野，射下 D 野出來咁，但都拍得幾刺激，起碼唔覺得寡先，特技精彩，有 D 位好明顯係為 3D 而設，如果睇 3D 效果應該會幾好 (我係睇 2D) 。結尾一幕唔知小說有無，定還是導演自己加落去，但我覺得好正，替整個系列畫上一個完美既句號，我雖然唔係 HP 忠實勇躉，但都叫睇晒咁多集，睇完o個幕都有份莫名既失落感，相信如果係 fans 感受會更深，所以唔怪得 FB 個個都話唔捨得。整體來講套戲我收貨!

講完整體就想探討下細節，唔計之前幾集，就呢兩集 Deathly Hallows Part 1 & 2，我其實有以下呢幾樣唔係好明/唔鐘意之處 (**Spoilers Alert!!**):

1.) 我 part 1 開始先留意到 Harry 有個塊碎鏡片，part 2 有講本來係屬於 Sirius 既，但電影從來無講過塊鏡點來，Harry 又係點得到? 我諗應該書有講，但電影從來無交代過。

2.) Part 1 之前講話有條叫唔知咩 Grindelward 既o靚仔偷左支 Elder Wand，以為係個好重要既角色，點知後尾只係一個鏡頭影住條老野被 Voldemort 盤問 (記住，係一個鏡頭)，就話o個個老野係 Grindelward，講真如果唔係記得佢個名都唔會知o個個係佢囉，所以就話有時類似呢D交代得太快既情節真係唔番睇都留意唔到...

3.) 既然用得來做書名，咁究竟 Deathly Hallows 有咩實質既 significance 呢? 以我睇就好似無乜喎，除左支 Elder Wand 係傳說中最勁，Voldemort 想擁有之外，其餘兩樣好似同打敗 Voldemort 完全無關。但開頭講到又有晒特別符號，又話個符號週不時都見到，又話 Dumbledore 寫信比 Grindleward 都印個符號上去，搞到我仲以為係一個類似鳳凰會之類既秘密組織。又話咩三樣野 Together they make one master of death 咁，等人仲以為集齊三樣就可以對付 Voldemort 之類，點知完全唔係個回事... 其實之前兩集已經有咁既問題：Order of the Phoenix 搞一大輪野為左搵個水晶球 (Prophecy) ，但個水晶球除左預言左一句 Harry 同 Voldemort 兩個只能活一個呢樣"鬼唔知阿媽係女人"既預言之外，就無其他用途，臨尾仲散埋，唔明點解 Voldemort 要咁緊張呢樣野... Half Blood Prince 又係除左本書 D notes 幫 Harry 上 Potion 堂表現好之外，最後 Snape 係 Half Blood Prince 咁又點? 同主線故事有咩直接關係? 所以都唔知係個導演無交代清楚定還是書都係咁，如果書都係咁文不符題，我諗 Rowling 都可以話江郎才盡...

4.) 今集死左好多 Harry 既同學/朋友，但係拍得唔悲壯，我覺得其實可以煽情 D

5.) 我感覺到 Snape 其實應該係一個好悲壯既角色，佢應該真係犧牲左好多野，忍辱負重左好耐來守護 Harry，但係戲入面佢o個段 "回憶" 實在太過求其同埋倉促，令觀眾唔係好 feel 到佢所做既野其實係幾偉大，我相信書一定描述得好 D，電影o個一幕令我 feel 到得太少。

6.) 我開頭以為 apparition (瞬間轉移) 唔係一樣簡單既法術，我係見 Dumbledore o係 Half Blood Prince 用過，但 part 1 開頭無啦啦 Hermione 都識用，Ron 好似又識 (因為無啦啦發脾四走左)，但 Harry 應該唔識，咁究竟佢地幾時學識既呢? 咁用有無限制? 因為唔明點解凡係危急關頭硬係唔見佢地用，但平時又可以亂咁用...

7.) 究竟把 Sword of Gryffindor 最初點會落o係 Bellatrix 手上，比佢鎖到入保險庫? Part 2 雖然有提過話 Snape 調換左把假野，但究竟最初點解會有呢件事發生?

8.) 我本來幾集以來一直期待 Neville 可以手刃 Bellatrix，話晒都係殺父母仇人，點知臨尾搞掂佢既係 Ron 個老母，仲要佢個角色其實一直以來無乜特別，如果換轉係 Neville 我覺得會大快人心好多...

9.) Mad Eye part 1 開頭無啦啦就"話"死左 (保護 Harry 途中)，仲要係從其他人口中"話"咋喎，連點死都無交代，話晒都算係個重要角色，死得咁唔清唔楚都幾慘...

10.) 究竟 Dumbledore 同佢細佬同個妹過去有咩瓜葛呢? 戲入面輕輕帶過就算，但我作為觀眾好想知囉...

其實 part 1 有幾 part 都幾悶，所以其實我寧願佢當初刪咁 part 1 一 D 無謂情節，解釋番一 D 以上我唔明既地方，咁就最好。或者希望有睇過小說既可以指點下。希望佢第時出碟會有 D 咩"加長版"，deleted scenes 之類啦~

Rating: 4/5

Transformers: Dark of the Moon (Updated)

今日o係網上無意中睇到個驚人發現，有人竟然發現到 Transformers: Dark of the Moon 其中兩個鏡頭，竟然係 "recycle" 番導演六年前套 The Island 既其中一段片：

發現o個個先犀利，咁都比佢留意到! 我自問都睇過 The Island 幾次，但我都留意唔到。其實都幾 O 嘴，雖然話都係同一個導演拍既，而且只係 (搵到) 兩個鏡頭。不過我睇戲咁多年，真係未聽過有人咁做過，咁樣偷工減料其實都幾離譜，絕對有欺騙觀眾之嫌。套戲咁大製作，係咪真係有需要慳皮成咁呀? 本來已經比鬆左分，而家真係要扣番 D 印象分先得!

Updated rating: 3.5/5

Transformers: Dark of the Moon

如果 Transformers 1 值 5 分 (因為我真係好鐘意!)，Transformers 2 我會覺得只值 2 分，而我覺得呢套 Transformers: Dark of the Moon 應該可以有番 4 分!

上集拍攝既時候撞o岩荷理活編劇大罷工，又換人又寫得趕，所以故事肢離破碎，慘不忍睹，動作場面再好都救唔番。但今集又係搵番上集個編劇，其實都幾令人擔心，不過今次算係咁架喇，犯駁位已經比上集少，話晒 Transformers，唔可以強求咁多。而且我幾鍾意佢將某 D 劇情牽涉入一 D 世界大事，例如登陸月球，切爾諾貝爾事件等，都算幾有新鮮感。

今集同上集一樣都出現左好多 Transformers，好多"死左都唔知係邊個"既角色，不過呢個系列越拍越大，大堆頭實在係在所難免。但都有 D 比較突出既經典角色，個人比較喜愛既例如"冼撲" Leonard Nimoy 聲演既 Sentinel Prime:

紅色法拉利 Dino ("紅色的跑車是帶著神秘~"，仲要係操意大利口音，勁正!):

Shockwave (好彩中文係識得譯做"衝擊波"，而唔係"震波"，如果唔係都幾搞笑 :P):

Soundwave + Laserbeak (兩個o係動畫中"秤不離舵"，Soundwave 舊作中係部卡式帶機，但電影中係架Mercedes Benz SLS AMG):

同埋o個幾架重裝 NASCAR Wreckers (Leadfoot，Roadbuster，Topspin)，car mode 型到震!!：

今集 D Transformers 仲多左個 "Stealth Force Form"，即係類似半變型狀態，"隊"晒D武器出來，o係電影入面拍得幾型，係今集一個幾正幾新鮮既 addition:

女主角亦由 Megan Fox 換左做 Victoria Secret 超模 Rosie 唔知乜叉，但係我審美眼光有問題，我覺得真係一 D 都唔靚囉，不過個角色叫做幾討好，一個有錢得來幾忠心既女友，呢D直頭係為宅男而設既 Dream Girl 啦! 另外亦有 Hangover o既 Mr. Chow 客串做下 D 搞笑角色，John Malkovich 亦有份演出，但個角色其實可有可無。

"嘩..你睇下你個咀大到..."

而成套戲最有睇頭一定係動作場面，Michael Bay 可以話係一個令我又愛又恨既導演，唔鍾意係佢太自以為是，但係佢拍動作場面真係有一手，可以話無出其右 (自從 "Bad Boys",  "The Rock" 已經鍾意佢)。佢拍既動作場面真係一次比一次"癲"，睇既時候往往令你有 "唔係下話，咁都得?"，或者 "咁都唔死得?" 既想法，同埋佢既鏡頭運用真係比到一種令人窒息既臨場感，戲入面既戰鬥場面簡直睇到你熱血沸騰，同埋我好鍾意佢用 D 慢鏡，尤其係有變型過程既戰鬥場面，有一幕 Bumblebee 車住 Sam 半路跳高變型，拋左 Sam 出來再接番住 Sam 再變番架車，同時 Sam o係番入面，成個過程 crazy 得令人目瞪口呆，但清楚俐落，仲不乏喜劇效果，真係一絕!

今集亦係三集中戰況最慘烈既一集，打到 downtown Chicago 滿目瘡痍，後半段成套末日片咁 feel，博派狂派各 Transformers 連場大戰亦拍得好激烈，另外值得一提係戲入面出現過既 "wingman"，即係軍人著住wingman suit 跳出飛機o係天度"飛"，電影中拍得佢地好型，係其中一個 highlight of the film。

IMAX 3D 效果亦都好好，開頭太空船o個幕真係好 feel 到個"深"度，跟住 zoom 埋去 Sentinel Prime 隻眼o個時效果亦好震撼，仲有尾段柯柏文"Gundam 上身"飛過大廈中心o個一幕視覺效果都好似親歷其景咁! 成套戲係一套唔錯既感官享受，出 Blu-Ray 一定會買!

不過成套戲我比較唔鐘意既有以下幾點：

 - 柯柏文終於有貨櫃，入面仲要係武器庫! 真係好正，不過太少運用到
 - 麥加登又係太少戲份喇，我幾鍾意佢今集個造型，有幾分滄桑感
 - 狂派既目的係想用人類做奴隸幫佢地重建 Cybertron?? Er... 唔係好 logic 囉...
 - 將成個 Cybertron 拉落來地球會唔會誇左少少呀? 諗住擺o係邊呢? 無講...
 - 本來期待 Shockwave 會同柯柏文大戰，點知做低佢既係人類
 - 有一幕柯柏文飛飛下撞到 D 鋼欖，比 D  鋼欖纏住，搞到要人救，有 D 無稽
 - 臨尾女主角對麥加登用激漲法好似兒嬉左少少，不過呢 D 都係編劇既錯
 - 最尾o個幕柯柏文好似太殘忍喇，同佢宅心仁厚既性格突然間好大對比，佢個勢真係有少少令我以為佢會突然間話："哈哈哈，其實我都係奸既.."，跟住開始屠殺人類...

總括來講，除左某部分情節，作為 Transformers 電影，呢套都算交足功課, 入場為左睇兩派激戰既一定唔會失望!

Rating: 4/5

Sucker Punch

自從睇完"300"後，就愛上左 Zack Snyder，愛上佢o個種 style，o個種巧妙運用CGI + slow motion o既黑暗漫畫 feel (連彭氏兄弟都抄過佢，不過級數實在差太遠，唔能夠相題並論)。不過佢既作品又係一時時，其實除左"300"同 Watchmen 算係比較好之外，其他全部都只屬一般，Legend of the Guardians 算係佢動畫既新嘗試，不過故事同角色略嫌唔夠引人入勝。但無論套戲好唔好睇，總之有 Zack Snyder，視覺效果一定有保證先，呢套亦都唔例外!

套戲上畫時一置劣評，令到本來想去戲院睇既我都不禁卻步，卒之等到佢出碟先睇返。可能因為完全無期望，所以睇完我覺得套戲其實都唔係 D 影評講得咁差，都 ok 喎! 起碼佢個頭真係開得幾好，頭五分鐘無對白人聲，用一貫 Zack Snyder 拍攝手法帶出女主角身世，背景播著充滿迷幻 + Rock feel 既 "Sweet Dreams"，嘩! 簡直貼切到不得了! 令你覺得你即將會睇到一套好正既戲咁!

打鬥o個幾場戲更加係純官能享受，華麗既視覺效果 + 逼真既音效 ：刀劍，機關槍，飛機，大炮，噴火龍，我屋企七隻喇叭好似完全無停過咁，套音響真係好耐無試過咁劇烈既 work out! 火車o個幕槍戰既慢鏡同 one shot 效果簡直睇到我目瞪口呆! 幾個女仔舞刀弄槍有時某 d 鏡頭難免有 d 生硬，但 overall 都拍得幾型!! 故事都 ok，唯一挑剔係五位女角既交情可以著墨多一 D，其餘都唔係差丫，soundtrack 又正，背後既訊息雖然有 D 禪味，但套戲整體都唔係好似 D 人講到咁無內容同 confusing o者。其實我之前睇 trailer 已經估到套戲想講咩，所以成套戲既舖排我接受到，唔覺有咩問題。但我諗可能有 D 人 expect 套戲係美女大戰喪屍/怪獸既漫畫式歷險，但去睇先知道劇情唔係咁，一時接受唔到o者。

所以我覺得大眾實在誤解左呢套戲，有需要平反! - Rating: 4/5

Paul

Simon Pegg + Nick Frost 繼 Shaun of the Dead 同 Hot Fuzz 之後又一搞笑片! 佢兩個一向既喜劇化學作用已經係搞笑保證，另外搵 Seth Rogen 聲演成日吸大麻，粗口爛舌既騎哩外星人 Paul 真係再適合不過，佢把猥瑣聲真係令個角色更加抵死有趣，好耐都無睇過一套咁抵死既科幻喜劇，係近期少有能令我不禁大聲笑既電影!

片中亦有 d 影射其他科幻電影既對白同情節，如 Star Trek, Back to the Future， 例如酒吧內 live band 奏著 Star Wars IV 酒吧既音樂，Paul 當年點樣教史匹堡創作 E.T 等。令到我呢 d 電影迷會識得會心微笑!

唔知點解香港無上呢套，不過成套戲都充滿英文笑話，如果用中文字幕搞笑程度可能會大減...

Rating: 4/5

Super 8

J.J. Abrams 雖然近年個朵夠響，但佢 D 野真係一時時，唔計呢套，個人暫時最喜歡都係 Star Trek 同 Cloverfield，Fringe 都算 OK，但其他就麻麻，聽人講佢套 Lost 都係一味拖，最終都爛尾。但今次加埋史匹堡監製，再加埋個 trailer，我諗無人睇完個 trailer 會無興趣掛... 不過我其實真係好怕 D 戲開頭故弄玄虛，個 trailer 整到好似有怪物/外星人/鬼咁，但到頭來原來成套戲D鬼怪係唔會出場既，好彩呢套唔係咁...

Super 8 其實係一種舊款菲林既 format，而套戲既故事就係發生係 60 年代，一班鐘意拍片既細路身上。我睇過好多製作特輯，知道好多導演 (包括史匹堡)，細個都係好鍾意咁樣自己一班 friend 一齊拍片，所以我覺得一個傑出既導演，真係要由細已經有o個種興趣同熱誠，由細拍到大，先會拍得出好片。我諗史匹堡製作呢套戲個時，都應該會搵番自己少少童真...

唔知係咪因為套戲全部用上小演員做主角，加上 60 年代 feel，睇既時候令我真係有番細個個種心情，個感覺就好似細個第一次睇 E.T o個時咁，好新奇刺激。個故仔幾好，表面上講外星怪物襲小鎮，但其實都有講人與人之間感情，友情，男孩對母親既放不低等。一眾小演員都幾好演技，演得生鬼又討好。小女主角 Elle Fanning 係童星 Dakota Fanning 個妹，所以演戲呢家野原來都有家族遺傳，不過我覺得 Elle 好樣過 Dakota，演戲亦有種符合番佢年齡既自然，Dakota 而家已經係少女一名，但當年做 D 角色全部都成個老人精咁，第一次睇會覺得演技超班，但睇得多會有少少反感...

Anyway 呢套係近期值得推介入戲院睇既片，出 Blu-ray 一定睇多次!

Rating: 4.5/5

X-men: First Class

講真之前o個幾套 X-Men 真係無一套好睇，對上個套 Wolverine 簡直係垃圾! 但今次可能因為換左班底 (導演拍過 Kick-Ass, Snatch)，呢套前傳真係俾到我驚喜。 用二次大戰後的背景，講 Megneto 同 Professor X 成為敵對之前既故事。我唔係 X-Men 迷，唔知漫畫係咪咁，但個故事真係幾好，尤其尾段高潮位。兩位主角 James McAvoy 同 Michael Fassbender 都好好演技，應記一功! Kevin Becon 飾演既奸角亦都好正，Emma Frost 亦係焦點所在。其他年輕演員都幾有質素，d 角色 d 異能都幾獨特，不過最衰無 Cyclops 丫...

呢套戲仲要無逼你睇 3D，咁有良心，值得加分!

Rating: 4.5/5

Pirates of the Caribbean: On Stranger Tides

魔盜王系列其實拍到第三集已經麻麻地 (個人覺得都係第一二集最好睇)， 但總算個尾埋得幾好。雖然都估到第四集都係拍來掠水，但開頭都不免有少少期望。正所謂希望越大，乜乜物物... 唔知係咪因為換左導演既關係，成套戲即刻失色晒。成套戲其實只係睇 Johnny Depp 個人表演，但劇情薄弱。之前幾集 Jack Sparrow 每次化危為機，都好似符符碌碌撞手神咁，你永遠唔知佢係好彩定刻意，呢 d 神秘感先係佢既性格，先係佢 charming 既地方，但今集一開始就刻意話比觀眾聽 Jack Sparrow 係有勇有謀，個人覺得太過刻意，咁樣係一大敗筆。Black Beard 既出現好似夾硬為套戲安排一個奸角咁，如果佢係一個咁惡名昭彰，咁令人聞風喪膽既海盜，點解佢當初唔係 Brethren Court 成員之一? 另外香港 D 廣告賣到行話咩美人魚出場牽起整套戲既高潮... o下? 美人魚個幾場戲好普通咋喎! 無錯條女係幾靚，但香港 d 電車男唔係成世未見過女人，美人魚一出場就高潮下話? 同埋我覺得結尾個度太過簡單喇，應該可以轉折d。

呢套又係逼你睇3D，但 d 畫質都算幾好，不過突顯 3D 既鏡頭唔多，所以其實無 3D 都 ok。

Rating: 3/5

Thor

由睇完 Iron Man 2 結尾段預告開始，都對 Thor 有少少期待，不過睇完覺得成套戲好似好少野發生咁，成套戲除左仙界就只係得小鎮一個場景，故事一般，好似拍得好趕咁。可能只係當為 The Avengers 舖路所以比較求其。打鬥又唔算精彩，特技都 ok 既。不過呢套夾硬焗你睇3D，但D畫面好差，要扣分!

Rating: 2.5/5

李小龍 (Bruce Lee: My Brother)

港產片已達谷底，整個 2010 年我比較有興趣就只有呢套。皆因細個都做過一段日子李小龍迷，只係隨著年齡增長，熱情大大減卻。加上製作睇落都算認真，聽聞做左大量資料搜集，由李振輝，即係李小龍既胞弟，講述李小龍年輕時期既事蹟，並於李小龍七十冥壽推出，所以都有 D 期望。

不過套戲真係唔係好掂，最唔掂係 D 選角/演員。其實搵李治廷做李小龍我覺得 OK，身型面型同個樣都幾好，都尚算幾似 (你話如果搵陳偉霆我就真係接受唔到)，另外做得最好都係飾演李海泉既粱家輝，做梁醒波o個個都好正，但其他配角就真係完全唔掂! 鍾麗堤 D 對白完全唔知佢 up 乜，真係唔睇字幕都唔知佢講緊中文，廣東話唔正就好心佢配音啦；另外飾演光仔o個個大陸仔，真係樣衰都爆，蛇頭鼠眼又瘦，真係仲衰過o係黃崗口岸門口"嘍"你搭車o個 D，都唔明點解要搵佢做個外國留學富家子既角色，臨尾染上毒癮o個幕，我老婆都話："你睇佢個樣都知佢唔係第一日食白粉啦"; 仲有，謝婷婷真係好X樣衰!!! 眼細面又長，點可能做到 model 架? 如果靠關係咁林峰個妹都得啦，你話比我聽李小龍有貢米都唔吼但暗戀佢? sorry 真係完全說服唔到囉! MC Jin 同陳奐仁，產生喜劇作用就得，演技就麻麻，完全 feel 唔到龍城四虎既友情; 同埋開頭我奇怪點解會搵個差仔做李小龍細佬，但最尾佢出李小龍 D 舊照，佢細佬又好似真係鬼鬼地喎，所以都應該算似掛...

另外唔掂既就係劇本，雖然好多都係真有其事，但完全無重心，呢度一D o個度一D，令觀眾無從投入，好多情節好明顯係夾硬堆切入去，但完全係 irrelevant，尾段兩場打戲都係商業原素居多，仲搞到好似因為要響應番丹爺套葉問，再一次誤導觀眾連環拳 = 詠春!

套戲做得最好都係美指，真係好拍得出香港五，六十年代既感覺。套戲其實如果選角同劇本可以好 D，真係可以成為一套好好既李小龍紀念電影，但無奈而家 D 人太廢，加上不知所謂既三一規條 (即係規定港產片中一定要有三分一演員為內地演員，電影先可以賣埠去大陸) 已令港產片完全變質，所以再拍落去都係無希望架喇，齋買外國片返來播算啦!

Rating: 2/5

The Social Network

呢套 The Social Network 同 Inception 真係可以話係 2010 我睇過最好睇既電影! 導演 David Fincher 功力真係深不可測，借用 facebook 發跡史探討朋友間既友情，猜疑，妒忌，背叛。故事引人入勝兼有張力而且寫實，無需任何動作場面都能夠拍出如此無冷場o既好片，導演真係功不可抹。一眾年青演員表現亦非常出色，各人性格非常特出，飾演 Mark Zuckerberg 既 Jesse Eisenberg 真係好入型入格，但我覺得發揮得最好既係飾演 Eduardo o既 Andrew Garfield。好期待佢主演既新 Spiderman...

真係唔明點解我身邊仲有咁多人未睇呢套戲，淨係 facebook 題材 + David Fincher 都應該夠吸引入場啦，未睇既唔該拿拿聲去睇啦!!

Rating: 5/5!!

The Stieg Larsson's Dragon Tattoo Trilogy

1. The Girl with the Dragon Tattoo 
2. The Girl Who Played with Fire 
3. The Girl Who Kicked the Hornet's Nest

呢套瑞典電影真係唔錯， 開頭齋睇戲名同宣傳海報都唔知佢講乜，原來係講查案既，仲有關於女主角o既身世，社會黑幕等，拍得真係幾好，有劇力。難怪國際影評一置讚好! 搞到我地都特登買番本原著小說o來睇~

Rating: 4/5

當我介紹呢套戲俾同事睇時，我話第一集中文叫"龍紋身的女孩"，我同事聽錯以為我話"農民生的女孩"，仲話個 feel 好似張藝謀o個 D 娘爆國產片，講農村生活既女孩，真係勁搞笑~

美國佬都唔執輸，即刻開拍荷理活版，搵來新 007 Daniel Craig 同 Social Network 新晉美少女 Rooney Mara 做龍紋身女孩。咁真人來講 Rooney Mara 一定靚過瑞典版，但化裝後都係咁 goth，大大醜化左，同埋唔知會唔會好似瑞典版咁要裸露呢?

Update

幾個月無 update，因為真係懶左，同埋因為買o左新玩具，一得閒就試機，玩物喪志 :P 加上睇o既戲實在太多，實在無閒情好似之前咁每一套都紀錄。新一年我盡量嘗試再寫番多 D 啦下，最多淨係寫值得寫o個 D...