Christopher Nolan 既作品，再加上係 Batman 三部曲既最終回，The Dark Knight Rises 好睇就必然架喇，所以介紹都係多餘，或者不如先"挑剔"下套戲我個人覺得唔夠完美既地方：
今集片長雖然長達 2 hrs 45 mins，但我覺得其實唔係好夠用，因為劇情太"豐富"，實在無乜喘息既空間，好多細節我覺得其實可以交代得詳細D，我其實唔介意睇4個鐘，或者其實佢可以考慮分上下集，不過呢 D 花巧野都唔係好o岩 Nolan's style。唔知係咪因為咁，我覺得今次 Batman / Gotham 面對既威脅太過"大"，有少少"玩大左" feel，被 Bane "解放"後既 Gotham 所出現既戒嚴，審判，放逐, etc，硬係覺得有少少脫離現實。
同埋個天牢個概念有 D 唔知佢想點，係咩監獄來? o係邊度? 睇個環境好似o係唔知印度定西藏咁，但之後 Bruce 逃出來之後點解話咁快就可以返番 Gotham - 佢破左產無錢無飛機，城既出入口又 block 晒，究竟係點做得到? 同埋就算個窿係難爬，但成座野睇來"無皇管"咁，唔係好覺有幾難逃走，加上走一個可以放晒其他，作為一個監獄，個設計似乎好有問題。
我雖然唔係醫生，但段估斷左"Pang"骨無理由用手"啪"幾野就啪得番入去，跟住吊幾日繩就無事，Batman 大晒咩...
有一幕成班差人同 Bane 既軍隊紮行馬準備開戰，但忽然無啦啦好似"魔戒"式咁吶喊對衝... 呢套唔係古裝片，對方可是有鎗的，結果未衝到埋去已經有好多件被射低，o個幕成件事比人感覺有點滑稽...
挑完骨頭，講返真正主菜，今集我地見到既 Batman 其實已經唔似之前咁勇猛，我地見到既已經係一個筋疲力竭，心力交瘁既 Batman，Christian Bale 既演技真係好有說服力。戲入面佢唔只一次跌低，起番身，跌低，再起番身。佢為 Gotham 真係已經付出所有，但到臨尾仲話 "Not yet"，最後犧牲埋，實在悲壯。臨尾 Gordon 想知佢真正身份，Batman 話: "A hero can be anyone, even a man doing something as simple and reassuring as putting a coat around a young boy's shoulders..."，以此作為 Batman 既 last words，我覺得實在頗有意義。我見通常我地呢 D 七，八十後，唔知係咪情意結關係，梗會固執地認為 1989 Tim Burton 拍既 Batman 先係最經典，Michael Keaton 先係 The best Bruce Wayne/Batman 云云。8 年前我都絕對同意，但自從我睇過 Christopher Nolan 既 Batman，我自己好肯定 Christian Bale 先係演得最好既 Bruce Wayne，最好既 Batman，以後提起 Batman，我都會先諗起 Nolan 既系列，因為係我心目中佢先稱得上係經典。Batman 一個咁賺錢既人物，我相信日後肯定難免會重拍又重拍，但希望 Nolan 既 Batman 系列，從此為電影界定下標準，話比人聽："That's how a superhero movie should be made!"
Nolan's Batman 入面既裝備亦都總係往往可以比到一種 "More than meets the eyes" 既感覺我，睇過之前兩集製作特輯既都知道，所有 Batman 既戰衣，斗蓬，武器，車，其實全部都係真有其物。我記得當年 Batman Begins 做之前，見到架 Batmobile 既造型，"啞啞咋咋"咁，同歷代 Batmobile 一向源用既劃時代+流線形設計背道而馳，心裡面都有保留，之後睇套戲先知原來架 Tumbler 係咁正! 功能同現實感真係遠超歷代 Batmobile。而今集另一個焦點 - The Bat 亦唔例外，從來 Batwing 都係大大架，但 The Bat 反而唔係太大，型態上似蝙蝠+甲蟲，個設計係為左適合o係城市狹窄既空間穿梭，好符合今集動作場面既需要。之前幾套 Batman 電影例牌集集有新戰衣，新車，新武器，一集花巧過一集，但今集 Batman 都係用番舊戰衣, 舊 Batpod。就算上集換戰衣都只係因為現實中要方便演員拍攝時活動既需要。Nolan 呢種不造作，不浮誇既手法亦係點解我咁鍾意佢既 Batman 既原因，佢總係可以將 Batman 既世界好貼近現實咁呈現係我地面前，成件事好 believable!
今集既歹角 Bane，戲入面佢係一個肌肉型+心狠手辣既角色，佢同 Batman 拳頭肉搏個幾場動作戲真係拍得幾 intense。但後尾發現原來佢亦都係一個幾悲情既角色，我覺得佢對 Talia 既愛其實應該描寫多D，咁可以令人更加明白點解佢要為佢做咁多野。
 |
| 真正"斷背"! |
今集另一個矚目角色當然係 Catwoman (雖然成套戲佢從來無自稱/被稱過做 Catwoman)，雖然我本身都好鐘意 Anne Hathaway，但我個人覺得佢其實唔係好適合呢個 Catwoman/Selina Kyle 既角色，造型上我略嫌佢頭髮太長，角色上智慧同身手敏捷度都略嫌同我心目中既 Catwoman 仲有少少距離，亦好似少左一份 Catwoman 應有既顛倒眾生既媚態。我個人覺得搵 Kate Beckinsale 或類似氣質既女星做會好好多。另外佢千方百計要得到既所謂"洗底 Program" (Clean Slate)，我其實覺得都幾無必要，一來 erase 一個人資料有幾難? 一隻 virus 都做到，何況洗底何須靠 program? 以佢既技能，弄個新身份隱姓埋名有何難?
 |
| Kate Beckinsale (left) would've been a better Catwoman/Selina Kyle I think |
飾演 Miranda Tate 既女星 Marion Cotillard 其實一早已經有傳話佢係飾演 Talia Al Ghul，不過佢o係所有訪問中都死口否認。其實都明既，如果無諗過佢係 Talia 的話睇o個時確係會幾 surprise，我都係其中一個，不過同樣我覺得如果佢同 Bruce 既感情可以描寫深入 D，而唔係淋一場雨就上床咁簡單，佢臨尾既背叛會顯得更有張力。
 |
| Wish there was more of her as Talia |
飾演年輕探員 John Blake 既 Joseph Gordon Levitt 亦係一樣，大家睇完都好似一廂情願覺得佢係羅賓，雖然導演之前都誓神劈願話佢既 Batman 電影係唔會有 Robin。但同 Talia Al Ghul 個情況有 D 唔同，我覺得其實導演無講大話，因為 Robin 係戲入面真係無出現過，戲入面 Robin 係 John Blake 既真名 (Robin John Blake)，而無話佢係 Dick Grayson，Jason Todd 或者 Tim Drake, 所以佢唔係 Robin。我覺得導演咁樣表達法係想"象徵" John Blake 呢個角色既性質其實就好比 Robin，佢同 Batman 有相同理念，但戲入面佢係以一個熱血警察既身份協助 Batman，唔使戴住面具。戲入面講佢個角色特別 care D 孤兒，其實我覺得咁樣已經係向原著既 Robin 致o左敬 (因為原著三代 Robin 都係孤兒)，而唔需要 literally 真係要有個 side-kick 出現。自從 TDK 開始，Batman 一直都好想搵到繼承人，來到今集結尾，我地知道呢個人將會係 John Blake，雖然套戲無確實交代 (亦絕無需要交代)，但如果有空間再思考落去，我覺得佢都唔會做 Robin，可能佢會係 Nightwing 都未定，但我個人覺得佢應該會就咁直接成為第二任 Batman... 而睇到臨尾個幕，我領會到個戲名 The Dark Knight Rises 裡面既 Dark Knight 原來唔單止係指 Batman, 原來仲代表左 John Blake，因為佢繼承左 Batman 既遺志，而臨完場一個鏡頭導演更加用 Batcave 地台 "Rise" 起 John Blake 來呼應番個片名，我覺得真係好絕! 唔知有無人同我一樣領會到相同既意思呢?
 |
| A hero can be anyone... |
今集其實如果獨立咁睇，無可否認係無 The Dark Knight 咁精彩，主要原因我覺得都係因為唔夠時間，亦都可能係因為 TDK 實在好得太緊要，加上 Heath Ledger 演既 Joker 實在太難忘，我諗佢永遠都會被列入 D 類似 Top 10 best movie performance, etc，所以新一集 top 唔到。
但今集個劇情係串連番前兩集，尤其係第一集，所以如果成個系列咁睇，而今集作為整個系列既完結篇，我覺得真係好正，尤其係結尾，真係好 emotional, 睇完令人有種好唏噓既感覺。前兩集 Batman 除左劇情，令我印象最深刻就係對 Bruce 同 Alfred 之間主僕情既描寫，所以點解我話睇"桃姐"不如睇 Batman。Alfred 一直擔當父親既角色，教 Bruce 做人既道理，其中一句相信連小學生都識，顯淺至極既人生哲理 - "Why do we fall?"，其實可以話係貫穿三集既背後意義。今集戲入面當 Alfred 道出當年佢自己點樣面對 Bruce 失蹤既日子，我就知到臨尾一定會有 D 情節呼應番，結果真係，而且拍得好感動! Batman 為 Gotham 犧牲，父子兩代人都默默為 Gotham 付出，但最後咁多代 Wayne Family 都要 Alfred 親手埋葬，實在 so sad。最後 Alfred 一如以往到同一地方渡假，去同一咖啡店，結果今次佢既憧憬成真了。Bruce 報以微笑但彼此不相認，但卻深知道對方已 move on，過著更好的生活... 唔係講笑，我寫到呢度諗番起都有 D 眼濕濕，當時加埋 Hans Zimmer 既配樂，我實在諗唔到一個更有遺憾美既結局! 導演又再一次令我大開眼界!
同埋如果你再用"Inception 既方式"去諗，其實可以理解o個一幕都只係 Alfred 幻想出來，佢當時係無真正見到 Bruce。雖然我地知道 Bruce 其實六個月前已整好 The Bat 既 Auto-pilot，但我地亦見到 Batman 離炸彈爆炸幾秒前仲o係 The Bat 入面，所以其實真係任你點諗都得... 不過無論係點真係一 D 都唔重要，最重要係導演比我地知道佢既 Batman 旅程已經真真正正來到一個終結，無後路，無伏線，而且配以一個咁圓滿既結局，作為 fans，我地即使不捨但或者都應該真係要 move on 了...
以下係導演 Christopher Nolan 對 Batman 系列既"道別信"，寫得幾感性:
Christopher Nolan's Goodbye to the Batman Franchise
Rating: 4.5/5
睇完戲既當晚就突然得悉美國 Colorado 一間戲院播放 TDKR 途中發生冷血鎗擊案，真係好震驚，真係唔明點解呢個世界會發生呢 D 事，仲話o係兇徒屋企搵到 Batman 面具同海報。我諗導演，所有演員，台前幕後工作人員都唔想見到呢 D 事發生，希望所有死難者都得到安息，my condolences goes to all their families and love ones...
另外無意中睇到以下呢篇影評，我自問真係無作者咁好聯想力，亦無佢咁有政治意識，有 D 地方我覺得佢真係諗多左，但入面既見解確係寫得幾o岩，幾 interesting，香港人絕對應該一看!
夜神起義 - 一篇關於香港淪陷的寓言
