本來都無諗住會咁快會寫呢套，但呢套野真係好神，戲入面帶出好多主題，有好多地方都突然間會 trigger 到我地去思考，加上好多人話唔明/唔好睇，所以好想趁我既理解仲新鮮，未被其他資訊影響之前記低一下我既想法。
導演 Ridley Scott, 拍過 Blade Runner, Alien ，Gladiator 等經典，未睇過都應該聽過，佢 D 戲好少爛，永遠有一定既保證。呢套雖然影評好似麻麻，但我個人覺得可以話係佢繼 Alien 之後最正既作品。首先想講套戲係用 RED Epic cameras + ATOM 3D rig 拍，詳細規格無謂係度多作解釋，總之就建議真係要睇 IMAX 3D 版本先可以享受到套戲 intend 既效果，不過題外話，好可惜香港無一間"正規"既 IMAX 影院，Megabox 算係最接近，所以香港人屈就下啦... 要睇 IMAX 3D 唔係話因為會有好多飛 D 野埋來既鏡頭，其實係無添，反而係套戲有好多鏡頭都拍得好宏偉，你真係會好 feel 到個景深，例如開頭幾分鐘既流水山脈，到達異星後既金字塔山洞入面，效果真係可以用 breath taking 來形容，其餘有好多幕都真係好似 D 人係你面前做戲咁，效果算係我睇過咁多 3D 中做得最出色的。
 |
| Scene like this should be viewed in IMAX 3D |
另外我想講呢套係一套真正既科幻片，我咁講好似無乜特別，因為例如 Avengers, Men in Black, Avatar, Star Wars, etc 都係叫科幻片，所以其實我都唔知點解釋個分別好，或者咁講，個 D 其實嚴格來講可能 "幻" (Fiction) 既原素居多，真正可以比我確實感覺到有"科" Science + "幻" Fiction 既戲其實真係好耐都無睇過，但呢套由頭到尾真係俾到我真真正正既"科幻"片 feel，感覺截然不同! 不過唔好 expect 套戲會有異形大戰，呢套唔係一套咁既戲，呢套真係一套"科幻片"!
演員/角色亦都唔多作介紹，總係之係 such a fantastic cast! 當中不乏人氣演員，尤其以 Michael Fassbender 飾演既 David 最搶鏡，佢係呢套戲一個好重要角色，亦係其中一樣值得思考既 subject。
套戲係 Alien 前傳應該無人唔知，我見坊間討論好多人話套戲 doesn't explain anything，但我覺得套戲完全 explains EVERYTHING (well, almost)! 其實導演係訪問中提過，佢唔認呢套係 Alien 前傳，只係發生於同 Alien 同一時空，但真係唔好信佢，我覺得絕對係！只不過戲入面嘅 LV-223 星球唔係 Alien 入面嘅 LV-426，所以戲入面架飛船亦唔係 Alien 我地見到嗰架。況且其實 Alien 入面俾我地知道關於呢啲異星，或 Space Jokey (即係 Prometheus 裡面嘅 Engineer) 既資訊完全唔多，近乎無咁滯，所以導演其實 is free to tell whatever the fxck he wants! 根本無咩需要解釋。而且我覺得個故事仲算係為 Alien 設下左完美既起源 / back story!
 |
| Notice the hole on the Space Jockey's chest? Hm... (Scene from 1979 "Alien") |
以下 MAJOR SPOILER ALERT!! 未睇套戲唔想知劇情可以唔睇落去...
我見好似好多人都唔知開頭個 Engineer (戲入面造物者既統稱) 係度做咩, 其實我覺得真係已經幾明顯，我地見有架太空船飛走左，跟住個 Engineer 食左 D 黑色黏物，跟住身體開始分化，跌左落瀑布。跟住 zoom 埋佢 D DNA 到，變晒黑色跟住散開晒，跟住轉頭見到有 D 細胞開始組合，慢慢演變成一條新既彩色 DNA。如果咁都要畫公仔畫出腸，以我有限既理解能力，我會覺得開頭個個星球就係未有生命時既地球 (又或者係某星球，其實係唔係地球唔重要) ，而個 Engineer 既 mission 就係o係呢個星球製造生命，製造生命既"過程"就係要咁，佢係被挑選委以呢個重任，所以佢留低做始作俑者，其他人飛走...
D 黑色野係 D Engineers 研發既"微生物"，戲入面都有話班人相信個異星只係 D Engineers 既軍事機地，唔係佢地住既星球。就好似我地人類既軍事機地咁，都係用來研發 D 唔慌好野。我亦有理由相信開頭個 Engineer 食個 D 同我地後來見到一樽樽個 D 係唔同性質，可能係經過咁多年改良左既"新配方"，原因稍後會再講。
我都曾經有疑問過點解 David 要害 Charlie，因為套戲其中一個 message 係 "No man needs nothing", by the way，我開頭話套戲有好多劇情/對白會即時刺激你去思考就係咁意思，呢句對白就係其中一 樣，其餘仲有例如："The trick is not minding that it hurts"，"To create one must first destroy"，"big things have small beginnings" 等等。我其實都唔話想扮有深度咁，因為我都好憎 D 人係咁，不過而家唔係話要監硬諗 D 隱喻落去，而係戲入面導演已經刻意安排呢 D idea 真係兜口兜面向你提出，如果咁都唔去諗一諗我覺得真係對唔住自己。但我都 get 唔到咁多，只係想講幾 part 我比較深刻的... Anyway，既然 No man needs nothing，而 David 唔係人，咁佢有咩動機要害人? Program 佢既人只有 Weyland，不過害 Charlie 應該唔係 Weyland 意思，Weyland 既目的係想搵到造物者，同埋無人知 David 偷偷地帶左樽黑色野番來，not even Weyland。所以我覺得係 curiosity，或者 his "needs" for knowledge。而且其實佢無"害"過人，佢係"婉轉地"徵求過 Charlie 同意的，佢問："What are you willing to do to get the answers you are searching for?"，係 Charlie 自己話 "Anything"，所以 David 呢個角色，係好 interesting 的!
套戲個劇情已經擺到明係講我地既造物主係另有其人，所以甚麼無神論，陰謀論觀眾大可以自由發揮，無疑可以衍生出無數爭議性話題。不過我諗既係，造物者造人，人造左 David。咁人點睇造物者? 點睇自己? 人係咪覺得自己已經係神? David 又點睇我地?
點解 Engineers 要滅我地？呢層我有自己既見解。David 同 Charlie曾經有過類似以下既對話：
David 問 Charlie: "Why do you think humans made me?"
Charlie: "We made you because we could!"
David: "Imagine finding your creators only to hear they say the same thing about you..."
呢句說話真係一針見血，造物者造我地其實真係可以無特別原因，我地係佢眼中可能真係毫無特別價值，we made you because we could! 所以點解要滅我地? 好可能就係因為我地係"失敗作"，要重造，亦可能因為我地唔珍惜資源，破壞地球，又可能只不過純粹佢地發明左可以製造比我地更優秀生命既方法 (我之前所講既改良版)，我亦聽過有人話因為當年耶穌係 Engineer 派來，而我地殺左佢，所以要懲罰我地，都唔係無可能既，但其實係咩都唔重要，重點係 they can create us / wipe us out as they see fit. 只不過咁o岩係佢地成事之前，有 outbreak 而死剩一個。而戲入面都提過另一個重點 "To create one must first destroy"，所以佢地滅我地就係因為要 create，所以諗番轉頭，套戲開頭我地見到個個無生命既地球，好有可能就係佢地毀滅晒所有之前既生命後既景像。而事實係點應該只有導演先知，但我呢個 theory 我覺得絕對 make sense。
有一幕 Charlie 同 女主角 Elizabeth 講以現今科技，anybody can create life, Elizabeth 由於自己本身不育，於是對號入坐，大有感觸。點知後來反而成為異形誕生既"始源"，呢個舖排認真一絕，諷刺得來首尾呼應得天衣無縫!
異形誕生既舖排亦都係呢套戲我最滿意既地方，其實唔好話"誕生"，因為既然"唔係前傳"，點樣同 Alien 既故事連得上真係無從稽考，況且同 Alien 發生既時間只係相差幾十年，我地亦見 Engineers 飛船入面 D 璧畫，都曾經有疑似異形既畫像，所以好有可能當時係其他地方又或者係 LV-426 已經有異形/異形蛋存在。
其實真係唔係好明導演點解唔將套戲直接拍成真正既 Alien 前傳，點解唔話個星球就係 LV-426 而臨尾墜毀架飛船就係 Alien 個架，etc... 如果係的話我地呢 D Alien fans 真係會睇得熱血好多。不過可能佢都係唔想有咩差錯會破壞佢一手建立既經典，兩套戲無直接關係的話發揮空間可以大好多，呢樣我 buy 既，而且套戲本身真係絕對唔差! 希望 Ridley Scott 將來可以拍多套真正既前傳解釋番以上既疑團咁就真係超 perfect 喇!
另外以下係幾段非預告片性質既"真實片段"，係電影入面無既。一段係後生 Peter Weyalnd 既演講，另一段係 David 既 "宣傳易"，另一段係女主角 send 比 Peter Weyland 求佢提供飛船俾佢去探險既片段，都幾 interesting：
Prometheus 真係今個 summer 必睇大作，另一套必睇既當然係 The Dark Knight Rises，如果 The Dark Knight Rises 同呢套只可以揀一套，請揀 The Dark Knight Rises，如果唔係，對自己好 D，睇 IMAX 3D!
UPDATED:
原來片尾字幕完左之後仲有隱藏要素，不過唔係片段，只係得個畫面，不過跟住去佢上面個網址，原來仲有下文:
Rating: 5/5!!
