Exam

套戲應該成本極低，但拍出驚喜。故事講 8 位應徵者參與一份絕世筍工既終極考試，全片只得10個演員，一個場景，真係好考演員同導演功力，但都拍得出各人鬥智o個種緊湊氣氛同張力，盡顯人性陰暗一面。結局有少少俾我估到但都有驚喜，有種 "係喎，點解開頭估唔到呢?" 既感覺，首尾呼應，劇本實在寫得好，屬有創意之作，值得支持~

Rating: 4/5

Hot Tub Time Machine

好似自從 上年 Hangover 大 Hit 之後，荷理活就多左好多呢類一班人"歷險式"既 B 級喜劇。今次又玩時光倒流，所以真係橋唔怕舊，但如果拍得有特色 + 高娛樂性既，我其實又唔係太 mind。

套戲確實幾好笑，劇情都係o個 D 啦，唔 expect 故事會有太多驚喜，不過係主要係 D 對白搞鬼同埋飾演 Lou 既 Rob Corddry 既演出最搞笑，所以係值得一看。飾演三位主角少年o個幾位演員雖然出得幾o個鏡頭，但真係同幾位主角好似樣，唔講仲以為係電腦特技效果。

Rating: 4/5

She's Out of My League

見外國影評口碑幾好，所以睇下，發覺的確係唔錯，而且都幾搞笑。唔係一般o個 D 成班人圍威喂溝女 + 露肉 + 一堆咸濕笑話既青春愛情片。故仔係講機場保安員 Kirk o係機場邂逅"10分"索女 Molly,  後來 Molly 更主動提出約會兼順利發展成為情侶，但一向自問只值5分的 Kirk，不明所以的同時及在一眾好友燻陶下，自卑感慢慢湧現...

我覺得戲入面男主角同佢班朋友o既"計分制"都幾搞笑：男女相差唔可以多過 2 分，即係話如果你值 5 分，最多只配同 7 分既女一齊，夾 band 可以加 1 分... 真係咁都俾佢諗到 ，不過成班男仔 friend 一齊係會有好多呢D咁既無聊野...LOL~

套戲既題材都其實都幾似電車男，但勝在無左 D 婆媽o既喊苦喊忽情節。同埋我覺得現實生活如果有人好似男主角咁，無型無款但有 D 幽默感，都唔會話溝唔到女，最怕係o個 D 騎哩得來又無性格，淨係識做 Mr. Nice Guy 個 D，就真係注定最多俾人當 best friends...

Rating: 4/5

The A-Team

"I love it when a plan comes together!"

唔係講笑，呢套絕對係我今年暫時睇過最好睇既電影!! 滿懷期望去睇都喜出望外，真係無乜電影可以做到呢個效果! 選角一流，劇情緊湊 (唯一係個結局易估左 D)，動作場面精彩得來仲好有創意，仲要不乏搞笑場面，真係好耐無睇過一套娛樂性咁豐富既電影! 睇完行出戲院都聽到有 D 人仲哼住首主題音樂，可想而知係幾好睇! 四位主角性格鮮明，套戲能夠顯出各人特色之餘仲拍得出個種默契，令人 feel 到佢地真係一隊出生入死既 team。選角方面我覺得真係 perfect，好少 remake 電影可以令我覺得"新勝於舊"，我以前最喜愛既角色係喪榮，開頭都有 D 擔心 District 9 男主角 Sharlto Copley 會演得唔好，點知佢真係超搞笑 (扮 Braveheart 一幕真係笑到標眼水!)，絕對係成套戲我最喜愛既角色! 但唯一可惜既係鈍胎架經典招牌黑 van 開始無耐已經散左，之後就無再出現過...

Rating: 5/5!!!

講開 A-Team 真係有 D 心 up，事源我已經無奢望過我朋友中會有人咁有 taste 睇過舊版o個套劇集 (細個o個陣係亞視播架!)，但之前同屋企人飲茶，滿以為佢地呢個 age group，應該無可能無聽過"通天奇兵"o掛，於是同佢地提起將會上呢套新電影版，點知原來都無人知係咩o來，連一向最鐘意睇美劇既姑姐都話未聽過! 我話 "唔係下話，呢，有個大隻黑鬼叫鈍胎架呢，但好怕搭飛機既，仲有個叫喪榮，傻傻地但楂飛機好叻架呢..." 都係無反應，我當堂心灰意冷，唉，唔通搵個知音人都真係咁難...??

其實肯定大把人睇過，只係我識唔到...-_-

講開經典美劇，另外有兩套都係我兒時至愛，唔知遲 D 會唔會都被般上大銀幕呢?

MacGyver (中文好似叫：玉面飛龍) - 主角 Angus MacGyver 係一個通天曉，唔用槍，齋用腦，每次遇上任何困難，險境，都能夠運用智慧成功化解，男人典範!

Knight Rider (唔記得中文叫咩，好似霹咩靂咩...) - 講架識講野既跑車同男主角一齊警惡懲奸，當年男主角就係而家 "America's Got Talent" 其中一個評判 David Hasselhoff。o個時一架識講野既車係已經超 cool 既事，但而家連變型金剛都拍得出，我諗如果重拍呢套戲都已經無乜吸引力了...

When in Rome

唔錯o既輕鬆愛情喜劇，比想像中OK，都幾 funny。一向都幾鐘意女主角 Kristen Bell，樣唔差，演技多元化，正經又得，癲喪又得，都演得好討好。同埋戲入面做男主角好朋友個肥仔講 D 對白都好搞笑。唯一美中不足係男女主角高度差太遠，令到有 D 談情位無乜美感。

講開女角，令我諗起萬淫迷 Megan Fox, 講真真係求其搵個 Kristen Bell 呢類女星都靚過佢，我真係完全唔覺得佢有咩咁正，仲要喪屍般的演技，完全唔明點解 D 宅男會咁迷佢，前世未見過波嗎?

Rating: 3.5/5

今晚睇 A-Team，正!!!

Daybreakers

非一般殭屍片，題材幾新穎。之前見美國都無乜宣傳，所以無乜特別留意呢套戲，點知原來都幾唔錯，真係可以話係滄海遺珠。故事講 2019 年，全世界 95% 都變成吸血殭屍，只得返 5% 人類。殭屍面臨飢荒危機，如果長期無血吸就會"獸化"。主角飾演不嗜人血既殭屍科學家 Edward 一直想研製血液代替品但唔成功，直至遇上因一次意外，奇蹟地由殭屍變返人既 Elvis，於是就決心一同找出 cure...

戲入面吸血殭屍同一般我地想像既無乜分別，都係長生不老，怕陽光同木杉穿心，但我覺得好多殭屍社會既概念都好新奇，係你諗唔到，但當你睇到又會覺得："係喎，吸血殭屍社會係應該咁架喎..."，所以都幾有趣，同埋我幾鐘意佢個 idea of the cure，幾有創意。之前睇過幾集類似題材劇集 True Blood，講現今社會已經係吸血殭屍同人類共存，但我覺得套劇一味淨係識買弄色情 (我覺得係色情版 Twilight)，故事無深度，都唔知點解會咁受歡迎，我覺得 Daybreakers 既故事背景明顯高章法好多...

Rating: 4/5

Green Zone

Bourne 系列導演 + Matt Damon 再次合作, 不過 Matt Damon 今次唔係做間諜，但唔知點解中文譯名依然要用"叛諜"呢兩個字，有時覺得香港淨係識翻炒戲名，一係就譯到九屁不通，真係毫無文化水平!

套戲都幾好睇，同 Bourne 系列差唔多水準，故事都係講伊拉克戰爭 + 美國政府陰謀呢類反戰題材，雖然有少少舊瓶新酒，但都拍得幾好，係鏡頭有 D 搖得滯，同埋線人 Freddie 既出現好似太過 convenient，但我覺得至少好睇過 Hurt Locker。

Rating: 4/5

The Book of Eli

唔知點解之前一直有個概念呢套戲好好睇，唔記得o左係聽人講邊定係睇影評，加上我見係 Denzel Washington + Gary Oldman，就更加無乜懷疑，但其實一直連套戲講咩都未知。見香港遲遲唔肯上，於是上個星期就做左一件我平時好少會做o既野 - blind buy (即係未睇過套戲就買碟)，點知...

睇完先發覺原來係套宗教片o來o既!! 雖然套戲都唔係太差，叫做有 D 動作，但係始終唔係我杯茶，我諗如果係信徒會 appreiate 套戲多D (尤其臨尾，確實估佢唔到), 始終呢類故事會令到佢地好 want to believe。但平常心睇，我覺得其實成個故事好多 plot holes，例如佢講到 D 食物，水，電，好似好珍貴，但套戲又俾唔到我覺得係囉。老婆問我係咪好同意戲裡面壞人既理念，其實我唔係話同意，只不過我都覺得真係好視乎本書落係咩人手上，而現今呢個世界...... 唉~

Rating: 3/5

The Imaginarium of Doctor Parnassus

"You can't stop stories being told..."

小丑 Heath Ledger 既遺作無疑係呢套戲既最大賣點，但令我想睇呢套戲既原因係當時 Heath Ledger 只係完成o左一半既戲份就離開左，production 停滯多時，後來全靠導演既努力，再加上 Heath 的三位好朋友 Johnny Depp, Jude Law, Colin Farrel 犧牲自己時間自薦演出，先至令到呢部戲能夠重見天日。而且三位更將所有收入全數奉獻給 Heath 的女兒。所以背後各人的貢獻同努力，先係呢套戲真正吸引我既地方。

故事講述千歲僧人 Doctor Parnassus 當年為換來愛情而放棄長生不死跟魔鬼做交易，條件係女兒 Valentina 滿 16 歲時便歸魔鬼所有。Parnassus 一直帶著女兒同佢地既流動劇團o係倫敦街頭表演，利用自己的 imaginarium 帶人進入幻想世界 (目的係要讓人o係幻想中戰勝誘惑? 尋找自我? 救贖心靈? 我其實都唔係十分明係點 work，只係知 D 人最後會有個 choice...)。 就o係 Valentina 16 歲期限將到時，魔鬼再跟 Parnassus 打賭若 Parnassus 能比他先奪得5個靈魂，Valentina 就可以留低。呢個時候劇團又o係路上救回神秘人Tony (Heath Ledger飾)...

我唔知套戲背後有無咩深層意義或想帶出 D 咩訊息，因為我資質有限，都唔係好 get 到。但如果當係一套奇幻歷程來睇，我覺得一般啦。不過不得不讚既係導演 Terry Gilliam， 將4人分飾一角呢個 idea 處理得好好，拍出來感覺好"原裝"，一 D 都唔覺得係因為要補鑊先諗出來既橋。演員演出同樣出色，Christopher Plummer 飾演一時明智一時胡塗的 Parnassus 好到位，Johnny Depp, Jude Law, Colin Farrel 雖然戲份唔多，但依然各自搶盡風頭。至於Heath Ledger，被世人記得既都應該只會係佢 Batman: The Dark Knight 入面的精嶄演出，但佢o係呢套戲入面既表現亦絕對唔差。失去一個咁好o既演員確實係觀眾o既損失... RIP, Heath!

Rating: 3.5/5

It's Complicated

真係無改錯戲名，戲入面段關係真係幾 complicated。不過估唔到套戲原來都幾搞笑，我覺得有 D 位仲好笑過 D 齋 sell 攪笑既笑片。套戲集愛情，溫情，喜劇元素於一身，我覺得幾好睇，飾演三位仔女同女婿o個幾位演員都幾討好。導演 Nancy Meyers 對上一套作品係 The Holiday，感情戲拍得一貫細膩，值得一看!

Rating: 4/5